【29+1】奪尼斯影展外語片最佳導演獎 彭秀慧：真係冇諗過會攞
女性主題電影《29+1》早前才在香港正式上映，很快就獲得很多媒體與觀眾的正面評價。電影還沒落畫已成功在外地獲得高度評價，導演彭秀慧在法國尼斯影展中勇奪今年的外語片最佳導演獎。相信獲獎對整個《29+1》的製作團隊打了一枝強心針，恭喜晒！
其實今次尼斯影展中，《29+1》一共有四項提名，包括最佳導演 ( 外語劇情片)、最佳原創劇本 ( 外語劇情片 ) 、最佳外語劇情片及最佳女配角 ( 外語劇情片 )。最後在芸芸有實力的競爭者中，彭導成功擊敗12位對手，榮獲外語片最佳導演獎，真的得來不易。
對於獲獎，彭導說：「好開心可以攞到呢個獎，喺一個國際電影節入面，《29+1》有四個提名已經係好大榮譽，更加開心嘅係今次得獎嘅時候，難得有好多人同我一齊出席頒獎禮，分享喜悅；由於Joyce有提名，我哋可以一齊坐、一齊緊張、一齊等公佈消息。最難得係當晚頒發好多唔同獎，宣佈每一個候選名單時，見到全世界好多唔同電影被提名，每一齣都好犀利好有水準，所以我同Joyce都係抱住一個有得參與已經好開心嘅感想，尤其是外語片最佳導演被提名係有13個，自己真係冇諗過會攞，所以當宣佈有獎時真係好開心。」
有份被提名的鄭欣宜雖然未能獲獎，但她表示其實有份提名已經好榮幸。「其實參加呢個影展好開心、好緊張，有晒世界各地好多電影一齊競逐每一個獎項，特別係戥導演高興，因為有13個提名，導演要打敗12個人而得到外語片最佳導演獎，所以好開心，亦都因為見證佢拍嘅時候嘅辛苦，同做嘅後期，一齊去諗宣傳，佢係一個好親力親為嘅導演，我覺得佢得到呢個獎係非常之值得。我望住佢，我淨係識講『辛苦晒，You did it！』好似好行、好簡單，但我真係想同佢講所有hard work係值得，即使做呢部戲幾辛苦都好，係會有人睇到。就算嚟到法國，冇人知道彭秀慧、鄭欣宜、周秀娜、《29+1》舞台劇，但係大家都會睇到《29+1》電影入面佢嘅誠意同hard work，所以再次恭喜佢。」
《29+1》在香港仍上映中，相信這個獎除了對製作團隊打了支強心針外，亦對刺激票房有一定作用。雖然同期有不少大戲，包括《異形：聖約》、愛瑪屈臣主演的《圓美圈套》、《神劍亞瑟王》等，但本地薑仍能在重圍下殺出一條血路。近來港產片愈做愈好，成功喚回大家對港產片的熱愛與關注，彭導絕對是其中的中堅份子。