【點止金牌配角】睇過《老笠》就知 林雪係Cult味最重嘅香港演員
杜sir杜琪峯愛將林雪，當年拍邵氏電影《力王》做臨記，要全身浸腐肉，口含血，扮怪獸臭足六個鐘，但就換來第一次銀幕上成功演出，跟住慢慢從場務拾級而上，成為港產片的金牌御用男配角，過程真的有血有汗。去年林雪參演的《老笠》都充滿血腥暴力，起碼佢條頸難逃「血光之災」，全程插住一把鉸剪，隔住個mon血淋淋，齋睇都覺得有啲痛。
《老笠》戲中，林雪是個mean爆的便利店老闆，粗口多到拍得住《低俗喜劇》，但冇再威逼人食牛歡喜，反而捉住廢青員工曾國祥隻手，手把手教他嘟貨收錢，「嘟喇，嘟喇，快啲嘟喇」，「你小兒麻痺呀？」，仲有「你唔記得講加五蚊換爆炸糖呀」，做事洗人唔洗本，一蚊都唔蝕人，所以當面對便衣警黑仔（姜皓文飾）路過借廁所，林雪二話不說話借，但就堅持要幫襯完先借，仲一定要買夠廿蚊，最後黑仔死死地氣買咗四包爆炸糖。
因為斤斤計較，林雪得罪另一客人老嘢（馮淬帆飾），老嘢別無他求，但絕不接受洗銅銀夾大聲，多年前打劫金鋪時發覺所偷的是假金，倒返轉頭殺哂成間金鋪嘅人，這是他盜亦有盜的原則。老嘢買咗個被咬一啖嘅三文治，想退貨時林雪拒絕不得止，仲指斥他一個老人家，夜媽媽捱麵包怪得邊個，這番話越過了雷池，觸及老嘢底線，他便手起刀落，一把鉸剪直插林雪的頸部，明言話要「老笠」便利店，自此開啟了一個瘋狂失常的夜晚。
《老笠》表面上講一宗便利店劫案所引起連串荒誕事情，但卻是一班看似無厘啦更、實質代表七百萬人內不同的人，在密閉空間內經歷一場黑色喜劇困獸鬥，猶如導演火火對回歸近廿年的香港現況總結，感覺大概就如老嘢所說，「我地個城市塞L住咗」，爆出來時就如拔了鉸剪後林雪的頸，血像開香檳似的一開不可收拾。不過當然林雪作為演員有他的看法，一年前在接受訪問時指，自己事先不知道要被插，知道的話，就不參演了，並放聲話考慮的不是金錢，因為「錢就一定無得加，一來就插把鉸剪，要在頸部痴塊假皮，我唔郁得，一郁就甩，日日好似瞓捩頸咁。」這種說法似是疑非，不理什麼導演隱喻，但其實背後說的感受真實，不似人家要揣摩、要抑鬱，又要扮精神病，所以話搵林雪演Cult片最適合不過，對導演來講都無手尾跟嘛。