蔡天鳳案｜郭富城出席首映打破沉默　回應事件：好震驚好悲痛

香港數碼犯罪電影《斷網》，由鄭保瑞監製、《麥路人》導演黃慶勳執導，三大影帝郭富城、林家棟、任達華主演，今日（2日）電影舉行首映禮，城城與林家棟攜同一眾主演出席，與觀眾見面。

《斷網》主演郭富城在首映禮接受訪問期間，繼早前出席馬會活動後打破沉默，就太太方媛閨密蔡天鳳遇害一事的心情，首度開腔回應，郭富城在訪問中表示：「今次呢件事，係一件好震驚、好悲痛嘅事。我同我太太都係對方嘅朋友，喺呢一刻我相信我太太需要一啲時間，我亦都唔想再講太多。」

上月24日，名媛蔡天鳳被殺害並遭到肢解烹屍案被揭發，事件轟動全港。蔡天鳳生前為「城嫂」方媛的閨密，私交甚篤，方媛去年七月更為Abby慶祝生日，二人在活動上合照留念。

口罩令解除後首次公開活動

對於能夠不用配戴口罩出席首映，郭富城笑指：「起碼你可以見到我個嘴係點囉！感動！」而林家棟則借機會提及拍攝所戴的特殊口罩：「但係我哋拍嗰時有戴嘅……慶幸我哋有一場戲都係要戴口罩嘅，但係個口罩就好硬囉！」郭富城則笑指：「嗰個係口罩兼面罩！」林家棟續指：「係講我哋喺（戲中）網絡森林裡面要戴一個好硬嘅面罩，嗰個就比較辛苦啲！」郭富城表示與林家棟自《寒戰》到現在才再次合作，表示非常高興：「我哋有說不完嘅話題，恍如隔世。」林家棟補充指：「由訓練班開始（講起）。」

《斷網》拍攝冇預計打交

而談到《斷網》拍攝的點滴，林家棟在訪問中表示拍攝前未有預料有動作戲：「本來冇㗎喎，我簽約嗰時冇㗎喎！」郭富城：「咪就係囉！」林家棟續指：「文戲嚟㗎喎，但係點解拍嗰時冇啦啦打嘅？佢話觀眾鍾意睇你哋打交喎！我話吓！」又對郭富城笑指：「你就成日拍馬騮仔咋喎，邊係鍾意睇我打交啫！」郭富城則笑指：「我簽約嗰時係又要打、又要演。」林家棟則笑指：「話明係網絡犯罪電影嚟㗎嘛，邊會打嘅啫！」郭富城則表示製作方要求：「佢哋話你（自己）係一個電腦天才，但係就要打到唔似一個高手，唔知點搞喇。」

郭富城表示：「我哋臨尾係有一場床下底打交！一直喺床下底到打！」林家棟借機開玩笑：「唔係床上面喎！係床下底喎！」林家棟續指：「導演其實call咗武術指導，仲有武術演員啦，但係佢哋都話好難處理喎呢個環境，咁導演就話『不如你哋兩個自己搞掂佢啦！』」

郭富城又提及另一場驚險的拍攝場面：「有一幕我記得係畀一班佢（林家棟）安排嘅殺手追殺嘅時候，我係要喺橋上面跳落去一架手推嘅木車頂，然後再落地下、再做反應、跟住再走，我覺得拍嗰場戲反而係好危險嘅。因為你放早咗威也，個人又會撞落去啲木到，係真木，係危險嘅。拍嘅時候拍咗幾個take，OK嘅嗰個take，係差啲要入醫院，因為佢哋放威也嘅時候要好快，要有速度、真實感，落到去嗰個木頂嘅時候其實我個頭係撞到嘅，仲要做一個暈暈哋嘅反應，嗰個（反應）係真嘅！」

至於拍攝高危戲份時，郭富城表示不禁向太太方媛申報：「我唔敢講囉！唔敢同我屋企人同埋個女講。但係呢個係我嘅職業嚟嘅，我相信佢哋睇完，今日囡囡冇嚟啦，太太睇完係會體諒嘅。」林家棟則笑指：「你望住我做咩啫！我都冇太太！點認同你喎！」郭富城則開玩笑指：「你望住我！相信我、將來會有！」