【人善天不欺】劉德華金句chok住講　拆彈都要睇個天

電影中的劉德華都愛講道理贈金句，可能華仔從出生開始，已經注定是這樣，俗語話「好醜面生成」，據說華仔眉清目秀，有情有義，搭上正好的顴骨，所以特別有社會責任心，當然玄學解釋並非精密科學，敬請留意。
金句如「人善天不欺」，「今時今日咁嘅服務態度」等，勵志不勵志都好，反正可見華仔性格鮮明、正直不柯。試問現今影壇有什麼藝人，能像他這樣chok住講「拆彈唔係你想做就做，要個天批批准」，又不失說服力，諗真其實無乜邊個carry得起，以下不如聽聽華仔教過你的做人道理。

「今時今日咁嘅服務態度」- 優質服務廣告（2002）

雖然華仔在電影中有不少金句，但當年最為人廣傳的是出自政府廣告這一句，「今時今日咁嘅服務態度，唔夠嫁」，可見當時香港回歸後幾年，服務業同港產片都陷入低迷狀態。

「人善天不欺，簡單一個道理」-《金雞2》​（2003）

明明是廣告歌，sell緊飲品，但變咗sell做人道理，真不簡單。這首歌在零三年沙士肆虐後發布，也出現在同年勵志電影《金雞2》，更由華仔圈內頭號粉絲吳君如阿金唱出，搞笑得來背後用心良苦。因為九七回歸後幾年，港產片陷入低迷狀態，加上一場瘟疫襲港後，社會上下一潭死水，所以《金雞2》中華仔決定粉墨登場扮特首，滿足香港市民願望，加上電影有群星撐場，合演共渡患難，如此落力都只不過希望香港人可以歡樂一宵。

「人品好，牌品自然好」-《嚦咕嚦咕新年財》（2002）

點先為之「人善」，02年華仔伙拍杜琪峯、韋家輝拍電影時，洩露過天機，原來跟「牌品好」都有關係。而在港產片低處未算低之時，杜琪峯放下警匪片，與韋家輝尋求革新，竟然拍出講做人道理的麻雀片。即使爛牌都好，人都要好好地打，華仔說是做人應有的態度，與「人善天不欺」分別是，仲未要望天打掛，可見在仍未到最絕望時刻的樂觀心態。

「萬般帶不走，唯有業隨身」-《大隻佬》（2003）

同樣是杜琪峯、韋家輝，華仔講的不是道理，而是佛理，適合劫後重生的港人。大隻佬（劉德華飾）不斷想教曉李鳳儀（張柏芝飾），前世種下因，便有今世的果，但李鳳儀始終執迷不悟，更鋌而走險上山尋求答案，講又唔聽，聽又唔信...結果最後難逃一死。

「講又唔聽，聽又唔做…」- 《江湖》（2004）

做人太多金句，未必句句聽得入耳，難怪華仔在《江湖》發牢騷說，「講你又唔聽，聽你又唔明，明你又唔做，做你又做錯，錯你又唔認，認你又唔改，改你又唔服，唔服又唔講」，據聞背熟了罵人，被罵的會目瞪口呆。

「非常時期用非常方法」-《寒戰》（2012）

十年後，華仔邊跳邊唱住「I don't wanna say goodbye」，繼續在演藝圈打拼。但榮升人夫，育有一女後，華仔及香港都變了。香港經歷零三年沙士後先是一沉不起，及後又欣欣向榮，到零八年金融海嘯再沉過，而來到2012年，梁振英任特首之期，剛好華仔就講出「非常時期用非常方法」，究竟當時所指的非常方法又是甚麽呢？來到2017年的《拆彈專家》，華仔再一次告訴我們，有些事情成事與否，原來都是「要睇個天」。