【金像獎】鄭中基8分鐘歌舞濃縮9套港產片　點解無大導王晶份？

今屆金像獎頒獎典禮主持人鄭中基，在開幕禮兼任表演嘉賓，八分鐘舞台劇式歌舞表演，濃縮九部經典港產片而成，用意當然是讚揚電影圈中人的努力，難怪贏得在場人士的掌聲如雷，又罕有地被網民激讚。雖然欠奉王晶的作品，但你當中認得出幾多套？

天才係編劇

鄭中基首先化身暴龍哥，重提牛歡喜炒酸菜，之後叫人咪亂信甜咪咪，仲指明話有跑車先有《甜蜜蜜》，之後雖然無搬出寶馬，但就拎咗《天若有情》華仔飛電單車上台，重演經典飛車畫面，卻再三提醒觀眾，劇本內裏有穿崩位，不停連橫自抽。

監製心慌慌

《殭屍先生》鬼新娘的自白，改成監製拍戲的心聲，他的眼光只有錢，無非關budget事，所以難怪下一幕突入《功夫》，輪到惡死能登包租婆登場，獅吼功式責罵，說穿了只不過為套戲，不然埋數超支時，又怎向老闆交代？

武師流晒汗

驚險功夫打鬥場面，背後全賴武指武師，終日與威也結伴，汗水見證着功勞，以《笑傲江湖》主題曲歌頌他們，最適合不過。不過，港產片點止得武俠片，之後鄭中基化身《少林足球》大力金剛腿，唱出「香港電影好近」，有本土片合拍片，有功夫片警匪片，有大片鬼片短片，總之乜都有。

導演、演員做乜嘢

香港名導演有很多，在表演中見到《阿飛正傳》時鐘，以及《英雄本色》白鴿，不用說都知道在說王家衛及吳字森，但看不到王晶有點令人失望。導演做嘢，未必人人明白，有時甚至演員，所以尾段亦借鄭中基把口，高唱「我不死每日無間做，有沒有風險，人人知道，做戲如變魔術」，It's magic之後就齊歡唱完場。