布斯韋利士被封爛片王　新戲被揭一個裝置對白都唔使背

66歲的布斯韋利士（Bruce Willis），曾經是8、90年代的票房保證，不過這位動作巨星近年因濫拍，被有「爛片奧斯卡」之稱的金草莓獎（Golden Raspberry Awards）提早封帝，今屆為他增設「2021年布斯韋利士最差電影演出獎」，將其在2021年公映過或上架的8套統統入圍讓大家揀，代表無論如何他都定必獲獎。

其實布斯韋利士濫拍已經不是新聞，更有傳他到片場前唔會背對白，每次埋位都靠工作人員通水提佢講邊句。最近他主演的新作《American Siege》上架，有眼利的外國觀眾從畫面見到，布斯韋利士耳內有粒呈肉色的東西，深信這正是無綫耳機，待拍攝時，工作人員可以直接提示下句對白。

不過亦有網民笑拍可能66歲的布斯韋利士年事已高，聽力不足，相中為助聽器。孰真孰假不得而知，但他近年都拍爛片就是不爭事實。