尚氣｜Marvel發布劉思慕巴士打鬥片　影迷質疑似成龍但唔湯唔水

Marvel超級英雄片《尚氣與十環幫傳奇》（Shang-Chi and the Legend of the Ten Rings》由劉思慕（Simu Liu）、梁朝偉、陳法拉、Awkwafina、張夢兒等人主演，Marvel Studios昨晚（20/8）再公開一條劉思慕和Awkwafina在巴士上的片段。

電影講到尚氣在逃離爸爸文武（梁朝偉　飾）的掌控後，暫且過上一般人的生活，但就因為他擁有的頸鏈令到一班壞人搵上門，逼得他不得不使出真功夫！

不過有網民表示一睇這場動作片就似是在學成龍，還要學又學得不像樣，「要靠慢動作造氣氛已經冇左（咗）果（個）種爽快感，成龍D（啲）戲雖然對手都係一個一個上，但安排得好緊湊，畫面唔會有多餘空位比（俾）你覺得一條友打緊另一條友食花生，即係唔係想吹奏成龍，不過佢D（啲）打鬥戲既（嘅）拍法真係唔同境界，淨係呢1分鐘已經覺得打鬥場面差10皮。」

有網民表示同意以上講法之餘，更回應「《成龍的特技》有講過，呢樣同其他打戲係唔同亦好睇得多，《尚氣》呢幕睇到著褸除褸，呢樣都唔係啲咩新招。」

另外都有不少網民睇完片段都留言指出「我第一感覺都係成龍」、「打得唔好睇…..完全無動感」、「係2，30年前嗰種節奏」、「想學成龍又學到唔湯唔水」、「普通武打片咁，又唔係打得好睇」、「啲外國人當佢係Bruce lee（李小龍）同Jackie chan（成龍）咁」、更有人講到「搵甄子丹拍仲好睇啦」等等，覺得雖然打戲未算差，但就未有特式，似乎想拍出另一位成龍。其實套戲都未上，到底劉的表現如何，始終要睇過整場戲先可以下定論。

此外，有網民認為暫時只得一少部分不應就否定整部電影，都有人講到「其實打得好睇過之前套《黑寡婦》喎」、「可能外國人睇會ok嘅，但香港係功夫戲發源地，要外國人拍到一樣嘅水平係難啲，其實香港咁多叻嘅龍虎武師未乘機出去外國教拍功夫戲真係曬（嘥）左，不過外國又唔係咁多演員跟到香港功夫戲嘅要求。」