鬼同你住︱邵音音同情劏房戶：香港人唔應該住得咁辛苦
撰文：沈洛嘉
出版：更新：
由陳果執導，黃又南、邵音音、太保、車保羅、李麗珍、張達明等人主演的《鬼同你住》今日（3/8）舉行首映，由預告開始已經吸引觀眾目光的音音姐接受《香港01》訪問都表示開心見到電影上畫。
由於拍攝時期正值疫情期間，開工的確不容易，音音姐講到導演好好，特意租下一間大屋來進行拍攝，而期間大家都好少聚集，加上工作人員減少一半衛生意識極強，戴上口罩都不說話，現時感到幸好當初有拍，不然到後來疫情更嚴重時，今年就冇得睇這新戲，大家都好珍惜。
及後音音姐提到自己的特效妝更加不容易，她：「我個妝要化4個鐘頭，落妝都要4個鐘，仲要唔乾淨，加上個嘴又落咗好多gel，完全食唔到嘢，其實好辛苦。不過最後導演覺得太得人驚，好多戲都唔用，你睇下有我個樣嘅海報，全部都打咗個禁字！」
雖然電影是笑片，但都帶出了香港的土地問題，問到音音姐有冇試過在環境惡劣地方住過，她直言：「我就未住過，不過我覺得雖然唔應該係公開場合講，但我好同情住劏房嘅人，有頭髮邊個都唔想做癩痢，經濟環境好嘅人使乜住劏房，又唔好意思話俾朋友聽自己住邊度，真係要（搵辦法）安置佢哋，香港人喺世界上係好好命，唔應該住喺劏房咁辛苦，應該個個都可以上樓。」