莫文蔚曾合作方大同聞死訊失落婉惜　「佢嘅音樂會繼續Live On」

影帝劉青雲、樂壇天后莫文蔚與韓國女歌手CL（李彩麟）今日（4日）出席鐘錶品牌活動，為品牌於香港開設「愛彼香港AP House」揭幕。莫文蔚於活動上接受訪問，談及曾經合作的方大同於日前離世，莫文蔚表示聽聞死訊時深感可惜：「好失落、好可惜！同佢合作機會唔係好多，但我上一張唱片有特登邀請佢製作、創作一隻歌。」莫文蔚表示多年未與方大同見面，但亦有透過共同朋友得悉方大同近年健康狀況：「聽過佢最緊身體唔好，但冇諗過咁突然！佢嘅音樂會繼續Live On！佢真係好熱愛音樂，我哋樂壇好難得有咁嘅人，一直好欣賞佢。」

莫文蔚今日出席鐘錶品牌揭幕活動。（梁碧玲　攝）

難得出席鐘錶品牌活動，莫文蔚分享原來父親一直喜愛收藏名錶，自己繼承後亦發覺款式已「應有盡有」，而喜愛戴男裝手錶的莫文蔚，笑言：「因為我鍾意戴男人錶，成日同老公交換戴，佢見我戴得幾靚，又會攞返去戴下。」表示夫妻結婚多年，甚少送手錶為禮物：「但係佢每年都會送一隻戒指畀我，十指手指都戴唔晒㗎，結婚都13年喇！（寶石越來越大粒？）又好似真係越嚟越大！但我好少送返禮物畀佢。」

莫文蔚作為香港樂壇天后，近來積極開展巡迴演唱會，談到在香港辦個唱，莫文蔚興奮地表示心儀新開幕的啟德場館：「其實已經入咗紙報名，睇下緣份幾時到啦，一定係想喺啟德，因為依家開嘅都係Big Big Show，我哋會揀每個城市最大嘅球場，啟德做就Perfect！」至於今年會否有機會開騷，莫文蔚則表示聽聞今年的檔期全滿，或許要待一系列演唱會與球賽完成後再開辦。