【武漢肺炎】疫情重挫院線生意　《乜代宗師》有子華神都搞唔掂

今個新年受「武漢肺炎」疫情影響，內地賀歲片全撤檔，連帶數套電影如：《緊急救援》、《奪冠》（原名：《中國女排》）、《急先鋒》都未能如期上映，內地撤檔連帶香港都冇得睇，就連《肥龍過江》在內地上映的日子都需一改再改，再發展成轉戰網絡電影，相對地則是對戲院有莫大的影響，票房數子亦變得慘淡。

目前在香港上映的電影有《乜代宗師》、《家有囍事2020》、《怪醫D老篤》、《我的筍盤男友》、《變雀特工》、《肥龍過江(2020)》、《1917:逆戰救兵》、《陽光兔仔兵》、《烈火湊仔公》等等，當中2020年1月31日單日，《乜代宗師》上映場次有447場，收$763,189港元票房，平均一場收$1,707，不過相對上映只有308場的《我的筍盤男友》，收$537,503港元票房，平均一場收$2,065，比起《乜代宗師》更高。

原本《變雀特攻》這類合家歡電影啱晒大人小朋友，但根據目前社會狀況，家長都不敢帶小朋友外出、且留在人口密集的封閉環境中，以免一不小心受感染，該戲目前只收$257,413港元票房，平均一場收$1,138，一場約得10個人觀看，甚受影響。

日前黃埔花園確診第13宗「武漢肺炎」個案，有讀者提供資訊，指昨晚大約9:30左右，黃埔戲院未有人入場睇戲，睇《變雀特攻》變相成為2人包場。

記者昨日（1日）到荃灣愉景新城觀察，對比以往的星期六都會有很多家長帶小朋友到該商場，但昨日明顯地人流大大減少，去戲院買飛睇戲的人更是少之又少，戲院生意大受打擊。