【蝙蝠俠】羅拔柏迪臣終於騷肌肉　香水廣告冧暈粉絲

荷里活影星羅拔柏迪臣（Robert Pattinson）自落實演出新版《蝙蝠俠》（Batman）電影後，影迷都十分期待他的造型，但片商至今仍大賣關子。過去飾演蝙蝠俠的演員都會操肌，務求撐得起件蝙蝠戰衣，早前羅拔柏迪臣出席公開活動時就被指仍然相當瘦削，擔心他不夠肌肉，但實情是「禾桿冚珍珠」！

羅拔柏迪臣為品牌拍攝的香水廣告照近日曝光，身穿白色T恤的他，手臂肌肉線條突出，雖不至於爆肌程度，但已足夠令粉絲尖叫。而半裸造型更睇清其背肌及腹肌，令大批「絲打」流晒口水，紛紛在社交網站分享這輯照片。不過，有心水清網民就話黑白相令線條更明顯，照片亦有可能「後期加工」。

早前已有傳聞指羅拔柏迪臣操肌進度不佳，知情人士仲話呢個版本的蝙蝠俠不會很大隻，羅拔都話自己唔鍾意做運動，仲笑言操肌失敗的話，就會去做手術變大隻。其實飾演「沙贊」（Shazam）的Zachary Levi都承認過電影為其身材加工，所以大家不用太擔心羅拔的身材。