《Bad CGI Sharks》自嘲低成本爛片　假到震鯊魚成全片亮點

以兇殘嗜血的鯊魚做題材的電影長拍長有，經典如《大白鯊》，帶點Cult的《龍捲鯊》仲拍到第6集，而且橋唔怕舊，再有片商拍攝鯊魚，而且講明自己是低成本製作，連電影名都叫做《特效很爛的鯊魚》(Bad CGI Sharks)，亦由於先來一發自嘲，令觀眾對該片更加期待，擺明想睇下有幾爛。

電影《特效很爛的鯊魚》擺明車馬，導演MaJaMa大玩「爛到盡頭便是Cult」，條鯊魚假到震不特止，故事仲相當無厘頭，片中兩位主角兼編劇Jason Ellsworth及Matthew Ellsworth，不停被一條會飛的鯊魚追咬，或者觀眾會問為何鯊魚可以飛天，而且無水都可以生存？片中只係講Jason和Matthew兩兄弟因小事鬧翻，而他們在小時候寫了一個未完成，以鯊魚為題材的劇本，因為魔法令鯊魚在現實中出現，話明魔法，鯊魚當然可以四圍飛，完全不用講究是否合理，而片中亦不乏B級片元素，有血腥畫面、性感索女，至於超假鯊魚更加是全片靈魂所在，片名都講到咁白，斷估大家不會期待有《大白鯊》的逼真效果，當笑片睇可算交足貨。