【追龍II賊王】林家棟監製作搞足3年終開拍　「唔想現場打四圈」

林家棟昨晚（6月5日）出席《追龍II賊王》首映，能夠跟一眾《黑社會》演員再聚，拍攝時相當興奮。「雖然大家戲裏戲外身份都唔同晒，但過程是開心。相信觀眾都好期待將來我們可以再次集齊人，有埋林雪、張兆輝等，全世界再埋位拍部新作。」

當完演員，又轉個身份，問問家棟監製的作品，早前透露有多個劇本在手，到底幾時開拍？家棟坦言近日已變成追數佬般，不斷向製作人員追劇本追批文。林家棟︰「有部講了兩年，剛剛拍完making of，問幾時上？等緊批文；上年已交劇本哪部呢？等緊批文；又有一部講兩個男人的電影呢？劇本就快完成！還有一部講本地小食呢？這個月尾會有！終於有部今年年底應該可以開到機，大大話話都講了3年。因為我要求比較高，不想為遷就演員檔期等原因，影響劇本質素，一定要傾好寫好才開拍，否則去到現場『打四圈』（圍埋修改劇本）便浪費製作時間，要大家滿意了劇本方向才行。」