【新喜劇之王】農夫配音大獲好評　幫星爺打工要簽保密協議

由周星馳編劇與執導的賀歲電影《新喜劇之王》上映近一星期，好評口碑慢慢滲出來。而由於戲中絕大部分都是內地演員，對香港觀眾來說相對陌生，看過電影的都應該會覺得電影找來農夫配音，為整部戲加分不少。事關戲中有不少啜核對白，在農夫抵死的演繹下，真的讓香港人睇得特別有親切感。

《新喜劇之王》除了請到原版女主角「柳飄飄」張柏芝配音之外，星爺更找來農夫為新角色配廣東話玄對白，C君聲演王寶強飾演的「馬可」（馬老師），陸永就為導演一角配音。不少觀眾都大讚農夫配得好，幽默感十足的搞笑風格配以抵死﹑啜核的廣東話對白，令香港人看得更投入。

C君近日在網上分享自己首次入場看《新喜劇之王》的感受，他坦言自己為電影配音時，不能一氣呵成看完整部戲，直至現在才看《新喜劇之王》，覺得真的很好看，而能夠和現實中的喜劇之王合作，「直頭好似解鎖成就咁！多謝星爺！」。

星爺真係好高招！

C君接受《香港01》訪問時，就透露這次的工作尤其神秘，「最難忘是高度保密，接了這工作後，要簽一份保密協議，期間我都唔敢同人講自己做緊乜，甚至我多口問下其他角色會由邊個配，都唔講得俾我知。基本上我只知自己配馬可同陸永配導演角色，其他乜都唔知。」所以他近日入場看戲時，即使自己有份參與這部戲的製作，但仍然感覺非常緊張：「入到場睇都係好刺激，你先知配音時星爺咁著緊自己那句對白的原因，最緊要係笑中有淚，幾時想喊時又逗番你笑，好高招。」

凌晨被星爺急call

星爺到底有幾高要求？看看C君分享的經歷就知！「星爺就是精益求精，配音工作大約十多日完成，臨走同佢講再見時，佢話：『睇下點啦』，點知某日凌晨就突然被佢急call返去補配一句對白，一去到星爺原來已經喺度，仲講句：『話咗你啦！』一個廿年前已經成名唔使撈嘅人，都可以對部戲咁上心，無時無刻仲諗緊可以點再好啲，你都唔會無時無刻諗住個女朋友啦！仲要凌晨都陪你錄，你點會唔服佢？」

星爺出名拍戲嚴格，C君這次合作過後都深切感受到他對於電影有幾認真，仲話：「星爺每粒字都捉得好緊」，可見他們在配音工作上的確花了很多心機，相信觀眾應該都會感覺得到。

同星爺合作好似參加了訓練班

除了有大批影迷讚他們配音配得好，有網民更希望農夫參演，C君都話好有興趣：「唔好話網民，我都想呀，唔一定演番馬可，演咩角色都制。講真，今次配音俾佢捉住錄每一句，你都覺得學到嘢，更何況捉你演戲，直頭係個訓練班啦，我都等緊呢個機會。」

星爺變成了都市傳聞

難得可以跟星爺合作，不只C君興奮，連身邊的親朋都很好奇，「朋友知道我同星爺合作過後，最多人問係：『你真係見到星爺㗎？佢喺度㗎？份人係咪好惡？』即係星爺為人已經變咗都市傳聞，好多人想求證。而我最肯定嘅就係星爺做嘢真係好認真，好令人佩服。」有粉絲更在C君的社交網站留言，指近年星爺已很少與香港演員合作，農夫這次有機會跟前輩學習，這個機會極為難得，相信有不少圈中人都會很羨慕。