【限期破案】吳彥祖回歸港片　「想跟霆鋒拍《特警新人類3》」

吳彥祖（Daniel）回歸香港電影之作《限期破案》，由英皇電影投資，《衝鋒車》導演劉浩良執導，聯同衛詩雅、內地演員王千源主演，昨日在江門進行開鏡儀式。近年在美國生活和發展的Daniel，今次回歸港片，心情都非常興奮，亦好掛住港式製作，更揚言想趁今年是《特警新人類》20周年，跟霆鋒開拍第3集。

近年吳彥祖移居美國，先後拍過荷李活《盜墓者羅拉》，更與好兄弟馮德倫拍美劇《荒原》，不過對香港戲迷來說都餓得耐，所以今次回歸真係好有親切感。對於今次回歸，Daniel坦言因為劇本出色！「暫時不能劇透，開工幾天，我和導演、王千源等合作非常愉快，當然拍美劇、荷李活電影都好玩，但始終我在香港出身，這邊拍戲好專業，其他國家拍不出香港味道！」

既然回味，當然想重返啦，除了會拍《限期破案》，Daniel更心思思想同霆鋒再合作。「早前我去了希臘，當霆鋒的節目（《十二道鋒味》第五季）嘉賓，大家聊起想拍《特警新人類3》，相距第一集已快20年（明年），要預埋Stephen（馮德倫）！」

身為人父的Daniel，向來都好重視家人，特別是囡囡，是標準顧家好男人，拍《荒原》時，更帶愛女Raven到片場參觀，不過今次就冇囡囡份，因為她要開學。Daniel：「囡囡第一年讀幼稚園，我想她好好上課，學好中文。」原來Daniel係幫幫囡囡報中文學校。「我唯一後悔就是小時候沒好好學中文，不想她將來也後悔。」雖然身在外地，DanieL都冇忘本，真係要向你致敬！