【起底組】游學修新方式演宅男　刻意用黐脷筋講對白：減啲殺氣！

游學修出席電影《起底組》首映禮。阿修這次飾演一名宅男，更特別用「黐脷筋」的方法演繹部分台詞：「可能因為我本身粗眉大眼，個樣有啲殺氣，所以講野黐脷筋好似會符合個角色多啲，減輕啲殺氣。不過我又唔想大家對宅男有既定印象，覺得宅男就等於黐脷筋。」

有網民看完優先場表示阿修猶如本色出演，但阿修笑言自己並非典型宅男：「呢個角色好玩嘅地方就在於佢係一個好無自知之明嘅宅男，佢仲覺得人地先係宅男而自己唔係，我都有同導演傾過覺得咁樣演係最好，多謝大家鐘意呢個角色。」阿修又讚拍檔鄧月平演得好：「佢個角色係一個外冷內熱嘅女仔，初頭唔鍾意我同阿聲（林耀聲），但後尾知道我地係好人黎仲會幫返我哋。」

「起底」在日常生活中都常見，阿修就覺得女生才是真正的起底高手：「女仔為咗前男友，暗戀對象或者現任男友，係可以無所不用其極。我自己都試過Stalk（跟蹤）鐘意嘅女仔，睇下佢有拖拍未。」難怪電影會引起大家共鳴，相信人人都有試過跟蹤人吧！阿修又補充未入行前會怕被人起底，「我試過諗如果有一日我上咗高登，就太恐怖啦。不過而家作為公眾人物，我嘅好多野大家已經知，冇咩可以起，除非你有本事揾返我十幾年前啲醜照啦，咁就有啲尷。」