【大師兄】湯鎮業孖仔加入影壇 鍾意爸爸演奸角︰但份人好長氣
《大師兄》上映一個星期，觀眾都讚故事有愛心，對教育工作者有份承擔。而一班年輕演員的演出也獲好評。其中戲中一對孖仔，跟爸爸關係惡劣，幸得甄子丹協助下才得以修補。
戲中爸爸是駱應鈞，但真正的爸爸原來是大家熟悉的湯鎮業，孖仔分別是哥哥湯君慈（Bruce），及弟弟湯君耀（Chris）。兩位在戲中極反叛，現實中就非常聽話，爸爸話乜就乜，簡單到連開唔開冷氣都係爸爸話事，不過呢樣就關乎慳錢事。
一拳打爆細佬個鼻
這對湯鎮業的寶貝，大孖湯君慈（Bruce）、細孖湯君耀（Chris），一直在美國讀書，上年6月差不多畢業時，收到劇組通知，要找他們回港拍《大師兄》，於是立即趕回來。這對孖仔除了樣似，連興趣都差不多，大學都是主修社會學，副修電影，那麼外人又點分兩兄弟呢？大孖湯君慈︰「我塊面比較窄，細佬面型比較闊，身形亦比較高，性格又比較頑皮，我是較為成熟乖一點。」
乖還乖，兩兄弟都有爭吵時，而且唔單止用口，仲下下動手。大孖︰「兩兄弟經常在學校打架，因為是寄宿學校，日對夜對經常有爭拗，好多時要同學仔勸交。」最嚴重一次是二人落場打波，一個不小心細佬整到哥哥跌親，哥哥一口咬定細佬刻意，於是一下重拳就直送到細佬鼻樑，爆咗。細孖︰「我當時直頭暈咗一陣，到醒番時見到成地血，入到廁所仲見到個鼻歪咗，好痛。」這下重手，令Bruce被家人痛罵一場，但痛思之下，自此兩兄弟就冇再打架，咁計落，呢一拳都捱得抵。
【大師兄】甄子丹為汪詩詩15年來拒拍床戲吻戲 當年一見鍾情閃婚
細個嫌爸爸煩 現在珍惜相處
湯鎮業是個幽默的爸爸，這點兩個囝囝都感受到，但同樣又覺得他是個長氣爸爸，事事斤斤計較。細孖︰「（爸爸不在港時）反而覺得幾自由，因為他在家會好長氣，要我們執屋，冷氣都不准開太耐，又要你摺被執床，頗囉唆。」雖然係咁，但長大後又覺得爸爸有其可愛之處。
不講不知，其實湯鎮業有套特別的教導子女方式，就是女是縱，將最好的給她，男仔就要捱，目的就是要給予磨練。大孖︰「爸爸覺得女是要來疼錫，要給她最好的，所以家姐會有多一點零用錢，又可以用他的信用卡。至於做仔，就要學習刻苦，更要學識理財。」點捱法？冷氣都唔俾開算唔算一個鍛鍊？「佢會話我哋開冷氣開太耐，有時又只會開一部滲出來，好慳。」
不過湯鎮業有樣好，就是要捱就一齊捱，自己都非常節儉。大孖︰「夏天他從來都不開冷氣，只開風扇，又喜歡搭巴士地鐵，即使放工有多累都照搭，平時都好少出街吃飯，多數煮即食麵。」這種厚此薄彼的教育方式，又有冇令家姐有變得揮霍無度，極度港女呢？大孖︰「又冇，家姐其實是個好成熟的人，爸爸雖然疼鍚她，但可能年輕時已歎盡，長大了都懂得節儉，後來甚至會向我們解釋為何爸爸要這樣做。」可以湯鎮業這種另類教育非常有效，仔女都教得好。細孖︰「而家買罐可樂我都會格晒價先買。」
即睇兩兄弟溫馨家庭照