【大師兄】甄子丹唔做葉問做老師　回想當年：與同學有碰撞少不免

由甄子丹出品、監製及主演的電影《大師兄》於香港舉行首映禮，丹爺為了首映亦隆重歧視，一身校服衣著登場。訪問中丹爺也透露自己拍攝呢一部電影相當大風險：「我想拍一部校園教育電影，一路以來大家都知道我拍戲有宗旨，希望帶俾大家或者社會正能量，點解我要拍校園電影？因為學生讀完書要出嚟社會，咁一切都係由教育開始，但係我話俾投資者知道我要拍教育電影，大家都會覺得有冇搞錯，大家緊係覺得要拍《殺破狼》、《導火線》或者《葉問》啦，但我覺得電影喺一個強大平台，能夠傳遞訊息，我希望趁著我仲有少少號召力及影響力，可以透過電影做少少有意義嘅事情，所以拍咗呢一部電影。」丹爺更講到籌備過程中遇到好多困難，但最後解決成功。

丹爺拍攝電影時，會唔會回想起校園時候嘅佢呢？丹爺就話自己好大感觸至真：「如果當初讀書可以更加享受個段時間就好，但時間過咗去就冇得番轉頭，大家都做過學生，所以我拍呢一部戲係希望大家珍惜學習嘅光陰。」問到丹爺會點形容學生時期嘅自己呢？丹爺直言：「其實我冇大家所講咁調皮，我覺得一個專心練功夫嘅小朋友都唔會差得去邊嘅，因為你真係需要好多毅力、專注及時間投放入去。」丹爺笑言小時候喺學校與同學有「碰撞」係少不免。

戲中搵咗一班新面孔嘅年青演員，當初點解會冒險呢？丹爺解釋：「我覺得新人演學生先會有一種純真及真誠嘅感覺，但帶出一個問題，佢哋演戲一定係會冇經驗，所以點做呢？我搵咗導演叫佢同佢哋日日相處，了解每人特色，花咗好多時間去籌備。」但新演員面對丹爺嘅壓力會相當大？丹爺坦言冇俾好大壓力佢哋：「初初入去我都覺得佢哋好緊張，但慢慢同佢哋溝通，去開解佢哋，就冇緊張啦。」

內地對演員片酬問題作出規管最近鬧得熱哄哄，丹爺亦表示唔介意大家知道佢嘅片酬：「其實我覺得電影行業同其他工業一樣，你多勞多得，你做幾多咪交幾多稅，至於網上大家討論嗰個問題我就唔去評論啦，我覺得每一個案件亦唔同，每個演員所付出嘅市場價值係幾多，譬如一部戲投資者十元去俾兩元佢，佢嗰個回報機會可以達到兩元，咁咪俾佢，咁都要睇演員付出幾多，所有事都一樣。」