【跟著宜家衣櫃去旅行】窮遊巴黎靠IKEA？　對亡母履行的承諾

咩係窮遊，即係明明無錢，但又想去旅行，於是用最平嘅方法成行。電影《跟著宜家衣櫃去旅行》就係講一位印度年輕人，帶住100歐羅去到巴黎，為的唔係歎世界，而係完成母親遺願。

雖然100歐羅都有近成千銀港紙，但唔好話去歐洲，去個長洲食大粒魚蛋、芒果燸米糍都忟水。其實呢位印度窮L阿賈，出發原來係為完成亡母遺願，於是就帶著母親骨灰及100歐羅飛到巴黎。由於窮，所以第一站就去到宜家傢俬，想借宿一宵。而在舖頭就遇上女神店員瑪莉，當晚就順道潛入衣櫃「屈蛇」。

殊不知當晚，就連人帶櫃被運去英國，仲輾轉流落到西班牙、羅馬和利比亞，期間又巧遇巨星、黑幫同海盗，令他經歷一次奇蹟人生。男主角係印度男星丹努什，仲有《星光夢裡人》貝妮絲碧祖，以及《盜海狙擊》巴哈亞迪等演員。