【逆流大叔】吳鎮宇首映帶囝囝捧場　「佢冇乜運動細胞唔似我」

由吳鎮宇、黃德斌、潘燦良、胡子彤主演的電影《逆流大叔》，早前舉行了首映禮，身為主角吳鎮宇亦有出席，呢一部電影未上映之前外界評語也一致讚好，鎮宇都知道呢一件事，「之前一啲優先場有少少口碑出嚟，所以宜家開始有點緊張，想睇睇呢套戲最後嘅成果係乜。」始終係自己主演嘅電影，鎮宇今晚有冇帶埋囝囝嚟撐場？鎮宇表示有帶佢嚟，但唔係撐場，「咁宜家暑假，呢一套戲係可以一家大小都可以入場睇下嘅，咁咪嚟首映囉，唔通我睇完又同佢去睇多次咩。」

呢一部電影係一部熱血勵志電影，每一個人睇完都會吸收到唔同嘅訊息，問到鎮宇會想帶畀囝囝一個點樣嘅訊息？鎮宇覺得唔好同小朋友講咁多訊息，「其實電影嘅訊息要由把口講出嚟呢，咁部電影都幾慘，一個真正電影嘅訊息係會慢慢產生出嚟，唔係靠人哋強迫話畀佢聽，而每一個人睇完都會有唔同嘅訊息出嚟，我學電影老師教我，電影嘅作用就係咁啦。」

戲中拍攝過程令到鎮宇十分開心，因為鎮宇指同一班「麻甩佬」拍戲都幾好，大家都存在咗一種「麻甩」感情喺裡面。鎮宇透露其實自己並唔係一個熱愛運動嘅人，但十分之有運動細胞，「我騎馬冇人教，潛水都係一陣就學會，好多嘢我唔明白點解，我一拍戲運動細胞會出哂嚟。」但囝囝係咪同你一樣熱愛運動？「佢麻麻哋，但我睇過一個報導講佢宜家擁有呢個身型係好事，因為佢心臟習慣咗咁重，方便將來到你一米八高度嘅人，我睇番話發育時期肥少少嘅小朋友係比較有著數。」