【有片】《92黑玫瑰對黑玫瑰》上映26周年　梁家輝英泥頭最經典

經典港產喜劇，周星馳嘅作品應該可以全數入選，但，除咗星爺呢？喺港產片最輝煌嘅年代其實仲有好多選擇。1992年7月2日喺香港正式公映嘅《92黑玫瑰對黑玫瑰》，由不被看好，憑口碑氣勢如虹，連續上映5個多月﹗呢套戲更令梁家輝馮寶寶於翌年金像獎，一舉奪下最佳男主角及最佳女配角，向經典致敬同時締造一代經典。

《92黑玫瑰對黑玫瑰》由劉鎮偉執導，梁家輝、邵美琪、毛舜筠、黃韻詩、馮寶寶主演，本想向粵語長片致敬，演員大多正經八百講對白，但同時開創無厘頭以外嘅喜劇走向。梁家輝喺呢套戲以前，演正劇為主，即使喺《表姐，你好嘢﹗》亦非擔任搞笑崗位。《92黑玫瑰對黑玫瑰》發掘出梁家輝嘅喜劇細胞，冷面笑匠，撚聲但表情正經講對白，講講下忽然唱歌兼起舞，令人忍俊不禁。

戲中演員不時會突然唱歌，以歌詞表達情緒令人忍俊不禁。改編自翁倩玉日文作品《たそがれの赤い月》嘅《你回來吧》，梁家輝頂住滿頭英泥，一邊唱歌一邊急住向黃韻詩解釋；仲有梁家輝對著毛舜筠唱「小寶寶，食蛋糕，飯仔mun mun叔叔餵到，食過長大，大過冇壞，飯仔mun mun最鶯孤孤」；當然唔少得翻唱自譚炳文嘅《舊歡如夢》，不過大家最熟悉嘅版本，應該會係同年年尾，李克勤食住個勢翻唱，又唱又跳嘅版本，難得係同樣成為李克勤歌唱事業中的污點與經典。

1992年可算係港產片豐收年，由年初嘅《家有囍事》到揚威國際嘅《阮玲玉》，當年最高票房頭5位全部由星爺包辦，故此92年又稱為周星馳年。喺星爺橫掃影壇嘅同時，金像獎當屆影帝亦是由喜劇封帝，當年入圍最佳男主角有周星馳（《審死官》）、成龍（《警察故事3超級警察》）、向華強（《藍江傳之反飛組風雲》）以及梁家輝以兩套戲（《棋王》、《92黑玫瑰對黑玫瑰》）。最終憑喜劇封帝嘅卻不是周星馳，而係首次挑戰喜劇角色嘅梁家輝。此後佢亦接下多套喜劇，奠定其地位。