【功夫聯盟】中國四大高手集合　劉鎮偉新作扮《復仇者》伏味濃

跟周星馳合作的《西遊記》系列，可謂是導演劉鎮偉的巔峰之作，除了成為一代人的經典，也令他在內地甚吃得開。不過成功的滋味又令他往後不斷重複地創作西遊，無間輪迴。
上年一套《仙球大戰》，終於有新搞作，唔玩西遊玩Marvel超級英雄，雖然那份尷尬香港都唔敢上，但內地總算交到功課，於是再接再厲，今年嚟多套《功夫聯盟》，集黃飛鴻、霍元甲、陳真、葉問4位中國英雄於一片，穿越來到現代作戰，又英雄又聯盟，咁同《復仇者聯盟》有咩唔同？有！4位唔係搵聖石，你搵真愛！

據導演劉鎮偉講，《功夫聯盟》係以中國傳統宗師武術精神為核心，當中又會再帶點搞笑，輕鬆感覺。故事講趙文卓飾演的黃師傅、安志傑飾演的霍大俠、陳國坤飾演的陳阿真、杜宇航飾演的葉姓神秘人空降現代，助力漫畫家費英雄（書亞信 飾）追求真愛與夢想。從角色名可見，劉鎮偉唔想用到真實人名，但又想大家聯想到，所以全部都含含糊糊求個明白就算。

預告可見，劉導都盡量用不同手法去令大家聯想到四位的身份，例如裝束、打扮，以及所耍的招式都是無影腳、迷蹤拳、連環腿、詠春拳等，試圖將四大武學宗師對戰，然後又墮入現代環境下，誤打出不同笑料，當然是否好笑就要大家望望預告自行決定。其實抽Marvel水，早在劉導上部作品《仙球大戰》已見端倪，一場實事中就見到疑似變形俠醫、雷神、美國隊長等成員出現，當時呢段片就曾被網民瘋傳，唔係大讚，而係恥笑。至於今次的聯盟式創作，外型上係冇咁Marvel，但概念上就根本係同出一轍，相當尷尬。

睇下仲有咩離譜場口