【超人特工隊2】千嬅夫妻配音被嫌棄　軟硬配《反斗車王》最抵死

日前公布《超人特攻隊2》的配音名單，首度以夫妻檔開工的楊千嬅丁子高，本應是最大賣點，可惜網民對舊版念念不忘，仍然好想聽番吳鎮宇同郭藹明把聲。
其實Pixar動畫向來揀配音都有一手，次次都做到人聲合一，同角色好夾，你心目中最正之選又有冇以下幾位呢？

最抵死配搭　林海峰 葛民輝《反斗車王》

由軟硬合作，林海峰配麥坤，葛民輝配崩牙嘜的《反斗車王》，兩位向來都搞笑見稱，去到動畫配音就更加盡情發揮，林海峰嘅傲氣，葛民輝的傻氣，根本就反映緊真人性格，非常匹配，去到第二集，阿葛仲變成主角。

最窩心一對　劉青雲、郭藹明《海底奇兵》

千嬅夫妻檔配音大家唔多buy，但呢對夫妻檔就非常受落。由劉青雲聲飾的Mo仔爸爸馬倫，開場時有幕跟老婆望住班囝囝囡囡的溫馨場面，而太太一角就由真太太郭藹明聲演。雖然呢幕只得數分鐘，就一聽兩位把聲已經感受到濃濃的愛，好Sweet。如果由兩位配超能先生太太，又係另一光景。

愁得最可愛　王菀之《玩轉腦朋友》

《玩轉腦朋友》找來5位朋友配戲中的5種情緒，其中王菀之出名的雞仔聲，獲配阿愁，結果又出奇地好笑，盡情地演繹那份負能量，每句說話都在放負，但負得嚟又聽得人會心微笑，呢份功力唔易掌握。

【超人特工隊2】楊千嬅首度夫妻檔開工　「係仔仔6歲生日禮物」

最具代表性  劉青雲 張衛健《反斗奇兵》系列

又係劉青雲，佢都算係Pixar配音系列的開國功臣，因為招牌作《反斗奇兵》去到第2集，已經係劉青雲夾張衛健，分別為牛仔胡迪同巴斯光年發聲，呢對拍檔去到第3集都Keep住合作。至於一度延期的第4集，聽聞2019年先有得睇，希望到時兩位繼續發聲。

初代胡迪發聲  張錦程《反斗奇兵》第一集

提起胡迪，大家會立即醒起係張衛健，但其實第一集上畫時，《反斗奇兵》只係Pixar的長片試作，在成本有限下請唔到明星配音，所以第一集全數由專業配音員操刀，主角胡迪就有演員張錦程，一樣配到胡迪份招積。至於彈弓狗一角，都係由配音領班及甘草演員龍天生負責。