【洩密者們】譚小環難忘演《古惑仔》 「一反港姐形象係深刻啲」
自從譚小環轉行賣魚蛋後，大家都以為我們的港姐冠軍要淡出娛圈了！其實唔係，前陣子小環就客串了幾部電影，而率先同大家見面的就有跟吳鎮宇演夫妻的《洩密者們》。
今次小環要演一位警察，跟鎮宇是同袍，由於要做師姐關係，導演邱禮濤就要求她可否淡妝演出？譚小環︰「如果狀態好我覺得應該唔好化妝添！」靚，從來都是由自信帶出來。
被鎮宇鬧到真喊
計計數，譚小環對上一次的電影演出已經是2002年的《豐胸秘Cup》，雖然呢部都有吳鎮宇，但在戲內就未有同場，所以在《洩密者們》入面，小環係首次跟鎮宇合作。「以前喺電視台通常在化妝間見到，未試過真係一齊拍戲。今次合作最難忘係佢好帶到我入戲。有場戲講我想同佢離婚，要佢一埋位就鬧到我想喊，之前都好擔心培養唔到情緒，點知佢一嚟就好惡好癲咁鬧我，教到我真係想喊出嚟，佢真係一個好好嘅對手。」
「呢個世界係勤力先會靚！」
由於今次要演女警，導演邱禮濤想合乎實況，找小環時已要求她淡妝演出。「我覺得好合理，我都未見過女警濃妝艷抹，應該係要化淡妝的，如果狀態好我覺得應該唔好化妝添！不過唔化妝又似乎太寫實啦，哈哈……最終都係化番少少好啲。」
唔化妝唔係得個講字，小環就講明自己平日出街都主張唔化妝。「平時只會搽防曬，始終化妝品撻喺臉上太耐，對皮膚都唔好。各位女士想少啲暗瘡同皮膚白滑，一定要做防曬同夜晚徹底清理皮膚，定期做吓面膜。我比較少上美容院，最多兩、三月個先上一次做深層清潔，通常都喺屋企自己做多。記住：呢個世界係勤力先會靚！」
「遇到鍾意嘅角色已經好開心」
其實小環的大銀幕演出不多，不過第一部就已經係大家的集體回憶《古惑仔》系列，飾演KK一角。第一次拍戲就有代表作，當時會否有點意料之外？「《古惑仔》係我第一套電影，裏面嘅角色同我嘅港姐形象剛好相反，所以係會俾人印象深刻啲。其實有機會遇到自己鍾意嘅角色，我已經好開心，唔好話想拍代表作，只要每次接拍嘅電影，盡量拍到最好，俾心機去做，就套套都係我嘅代表作。」
對於演戲，小環其實仲有不少心癮，工作許可下都會客串下。「我對於演戲都仲好有興趣，只係近年比較少喺電視幕前同觀眾見面，但其實去年我都有客串過幾部電影，而家有機會揀戲，可以揀以前未做過又想挑戰嘅角色。好多人以為我退休唔做娛樂圈，其實我冇，如果有空檔我會繼續拍戲。」