張智霖拍攝沖涼戲全裸上陣：沖凍水涼大熱天時真係爽

由古天樂、吳鎮宇、張智霖、周秀娜、胡杏兒等主演的電影《死亡通知單暗黑者：首部曲「雙雄會」》來到拍攝尾聲，張智霖和胡杏兒著住西裝現身拍攝現場，香港近排氣溫急升，日日都三十幾度，在熱辣辣的天氣下進行拍攝，都咪話唔辛苦呀，不過作為演員，當然都要捱得苦啦，Chilam直言：「演員真係一個玩自己嘅工作囉，喺體能上又係啦，你情緒上又要大起大落啦，咁所以平時都要好好咁去對自己啦。」早前Chilam透露自己今次在戲中扮演一個情緒有問題嘅人，搞到好難抽離，現在終於殺青，Chilam都笑言要盡量抽離。

雖然天氣好熱，不過Chilam有一場沖涼戲份大叫幸福：「好舒服呀，嗰場戲，沖凍水涼添。大熱天時真係爽，但係嗰鏡頭咁大，所以大家咩都唔會睇到。」真是有小小遺憾啦，不過聽聞Chilam這場戲沒有帶泳褲打底喎：「真係唔記得咗呀（點算呀？）全裸囉，但係只係影到咁多啦。」

還有一個月就到暑假，Chilam已經plan好，帶囝囝魔童去英國，但就尚未有具體活動，Chilam表示現在的小朋友一係喺家中打機，或者踩下滑板等等就是最好的休息，不過他就不以為然：「其實我覺得有時去增廣見聞好緊要，所以應該要盡可能帶佢哋出去玩下，行下博物館呀，睇下人哋嘅文化，咁嘛享受下唔同嘅溫度呀，咁我覺得都係好重要㗎。」Chilam呢位廿四孝爸爸真係唔話得呀。