【復仇者3】星爵Chris Pratt上海孖吳京見面 中外超英傾合作？
撰文：洪曉璇
出版：更新：
超級英雄電影長拍長有，Marvel 嘅《復仇者聯盟3：無限之戰》上映至今全球票房已經超過19億美金，折合大約149億港幣﹗電影雲集數十位超級英雄，但都不敵大反派魁隆，彈指之間一半人灰飛煙滅。大家都知其實一直鋪路，《復仇者4》將會有Captain Marvel驚奇隊長現身一個救全家，呢日飾演星爵嘅Chris Pratt上載一張同吳京嘅合照，唔通想拉攏埋中國英雄加入對抗魁隆？
+4
Chris Pratt最近飛到上海宣傳《侏羅紀世界：迷失國度》（Jurassic World: Fallen Kingdom），連續幾日不停於網上分享上海之行所見所聞，Chris仲相當有心思，Facebook、IG、Twitter上載嘅嘢都有少少唔同。至於同吳京嘅合照呢？就只係貼咗喺微博，咁又係呀目標觀眾喺晒度呀嗎。Chris寫上：「我相當幸運可以跟戰狼吳京共進晚餐，急不及待想睇續集戰狼3﹗」
《復仇者聯盟4》片長逾3小時？ 導演羅素兄弟「會比上集更長！」【復仇者聯盟4】意大利雜誌率先爆故事大綱 證實又有英雄犧牲
吳京喺《戰狼II》嘅精湛演出連Chris Pratt都拜服，睇返張合照佢地搭晒膊頭，Chris仲指住吳京，好似小粉絲見到偶像一樣。明明Chris係去宣傳《侏羅紀世界：迷失國度》，但內地網友嘅反應大部分都指向《復仇者4》，留言話：「星爵翻身全靠他，打敗滅霸就是靠他﹗」、「是吳京，打敗滅霸的秘密武器出現了﹗」
仲有網友突破盲點改圖，話呢張合照入面嘅係「星爵和京奇隊長」，吳京個京，果然係創作力量同幻想會嚇你一跳呀。以吳京喺《戰狼II》嘅表現，又真係好打得嘅，Marvel會唔會真係考慮一下加多個「京奇隊長」呢？