【占士邦】丹尼爾格力新一集片酬5億 曾話割脈都唔拍又講大話？
撰文：許育民
出版：更新：
首先時間回到2014年，當英國男星丹尼爾格力（Daniel Craig）拍到個人主演第四集的占士邦電影《007：鬼影帝國》，已經耍手擰頭講到明割脈都唔會拍第5集。但上年，佢已經在電視節目訪問上，講明會接拍第5集。
到底發生咩事，令丹尼爾格力甘於當眾食言咁唔型？謎底終於解開，最新消息指，丹尼爾格力不單會兼任新一集的執行監製，而且片酬仲跳升到港幣5億！係5億喎！條脈？留番第6集先割啦！
雖然第25套007的戲名未定，但據報道指，演員同導演就已經落實，男主角鎖定係丹尼爾格力（Daniel Craig），今次將會係佢第5次飾演占士邦一角，跟第一代007辛康納利的6次演出差一次，而演得最多次007的，仍然是以7次居首位的羅渣摩亞。至於新一集的導演，已公報係執導《迷幻列車》、《一百萬零一夜》的丹尼波爾（Danny Boyle），相當有新鮮感。預計今年年底開拍，2019年秋季上映。
至於片酬方面，真係天價，報道指由於新一集丹尼爾格力會兼任埋監製，所以片酬將高達$5.2億港幣，比上一集《007：鬼影帝國》的$3.8億港幣高出1/3。有網民以上集140分鐘計算，丹爺在新一集每分鐘演出費就要$371萬港幣，每秒鐘盛惠6萬！
【007】丹尼爾格力出爾反爾玩fans 終於落實繼續做占士邦【007】丹尼爾傳反口再演占士邦 基斯杜化路蘭有機執導？【羅渣摩亞離世】生前經典7套 「占士邦」系列電影回顧【羅渣摩亞離世】自傳細說演占士邦點滴 羅渣自嘲不擅賭博
今日睇番呢堆數字，自然明白當日丹爺點解可以咁唔型，食言係食得有道理嘅。不過喺呢度，都想同大家回一回帶，當日他已經被節目主持人Stephen Colbert問到，點睇自己呢番說話，丹尼爾說：「我選擇了說很蠢的話，表現不出優雅與教養。我希望在高位退下火線，我很期待拍新一集。」咁收埋呢5億，唔好再唔拍第6集啦，榮休都仲得。