《大轟炸》靠外國勢力抗日？　布斯韋利士米路吉遜夥霆鋒並肩上陣

抗日題材向來在中國大受歡近，所以導演們但凡想拍戰爭片，呢個題材往往係首選。即將於8月17日，內地上映的《大轟炸》，就係呢種。不過呢部並非一般的抗日作，首先卡士已經有謝霆鋒、劉燁、陳偉霆，然後仲有布斯韋利士做軍官，更點題係仲有米路吉遜做藝術總監，呢次中美合作，真係許勝不許敗。

故事發生在1937年，繼淞滬戰爭失利後，國民政府宣佈遷都重慶，而日軍就從1938年2月18日至1944年12月19日，對重慶及周邊地區任意轟炸，史稱「重慶大轟炸」。講到呢度，身為熱血嘅中國人點可以退縮，所以電影主要講述一班年輕的中國飛行員（謝霆鋒、陳偉霆、劉燁、宋承憲），在美國飛行教官（布斯韋利士　飾）的幫助下，與日本空軍展開一連串拼死空戰。

說到拼死，不是虛詞，事實上當年我國的軍備跟日軍真係有段距離，教官可以幫補大家嘅技術，但就幫唔到軍備，可見４位飛行員都係死侍，要向觀眾展現「重慶不死中國不亡」的民族氣節。所以宣傳稿講到電影將會係一系列慘烈悲壯的空戰，可見故事應該好賺人熱淚，而首預告的最後一句，更加寫上︰「愈炸愈強」唔係講緊煎釀三寶，係講緊重慶市民的抗日決心。以呢個卡士，呢股熱血、呢份愛國精神，實情要將票房推至另一高峰，似有挑戰《戰狼II》56億人民幣票房之勢。

電影《大轟炸》其實係由中影集團、原畫影視、合禾影視、南國影業聯合出品，全中資製作，不過為加強氣勢，唔單止搵嚟布斯韋利士做魔鬼教官，仲有米路吉遜做藝術總監，不過單睇已發放的預告及劇照，就未感受到那股大美利堅的感覺，希望往後發佈的片段會有驚喜啦。