【夕陽戰士】黃秋生監督舞台劇回憶少年時：我後生嗰陣好痴線　　

2018年，對於一向新聞多多的黃秋生（Anthony）是特別的一年，尋父新聞鬧得熱烘烘、金像獎言論被無限放大……或者以上種種對於香港社會是大事件，但對他本人而言，今年的另一大事，就是由他創辦的劇團「神戲劇場」首次推出原創劇目《夕陽戰士》，而且由秋生首次擔任監督，並與《樹大招風》金馬獎最佳原著劇本得主龍文康一同編寫劇本。
攝影：鄭子峰

《夕陽戰士》故事以4個中年男性帶著老師的骨灰出海保衛國土，作為編劇及導演，秋生坦言對這次故事劇本沒有太大把握，「我自己都係第一次咁樣寫個劇本，自己梗係覺得唔係好得，總係覺得唔係好對路。」秋生笑言，這個故事啟發自他10年前的一個夢境，編劇龍文康說：「其實佢（秋生）第一次同我講已經係好耐之前，係突然同我講話有個老柴劇本，講4個老人家，成世人冇做過咩大事，又冇咩成就，想話臨老做一件事。」據兩人所講，他們最初的想法是由4位60歲以上的演員去擔演，奈何最終因為找不到演員而將4位主角年齡層降至「中年」，「當時我哋出咗第一稿劇本，但一路搵唔到合適嘅六十幾歲演員，咁就決定將4個角色改做四十幾歲囉。」秋生接著說：「喺香港搞藝術，成人就係要就啲咁嘅嘢……對於我嚟講，藝術就係一個dream，係無限制㗎嘛，但佢夾埋現實生活一齊就有限制啦。我唔係嬲，只係現實同夢想衝撞之下就有呢種事發生。」

雖然秋生和龍文康都坦言，《夕陽戰士》的劇本因為種種原因而有所改動，跟最初的想法──人到中年有些不同。所謂人到中年，大概就是四十至五十歲這個年紀，「我梗係中年啦！」秋生說。人到中年，很多時會回想很多過去的事，友情、親情甚至愛情……相信大家對秋生最深印象的就是年初他的尋父奇跡。重提父親，秋生說：「我對爸爸印象，一直都係一個幻影。」龍文康笑說：「佢想搵人去形容下就真。」秋生早前在英國重遇哥哥，他笑言雖然父親的個性，基本上他一無所知，但一直都有幻想，「我聽返哥哥形容嘅爸爸，同我幻想嘅係好接近（例如？）我唔知喺邊度睇到一個故事，就係話有兩個女仔喺孤兒院，有個就話：『唔知我媽媽係點嘅呢？』咁另一個就話：『你照下塊鏡就知你媽媽係點啦。』你睇我自己就知我老竇係點啦！佢同我一樣都係百厭、戇居，同我一樣，即係做埋啲好無賴嘅嘢，校快人個鐘啊，隻蛋唔熟叫個侍應行過嚟兜頭蓋落人個頭度，有單車叮我我搵把遮攝落佢個車轆度，我諗番我後生，我都會做咁嘅事。」

一講人到中年，相信不少男士會回想「那些年的年少輕狂」，《夕陽戰士》中的4位主角，是中年熱血，那秋生和龍文康呢？「我後生好痴線㗎！一個人去密林踩單車……因為我鍾意一個人。」一個人，對秋生而言並不等於寂寞，我問：「你哋算唔算係兄弟？」秋生說：「兄弟？唔好咁叫啦，好朋友囉。」在旁的龍文康笑道：「佢好多嘢唔鍾意講出口。」秋生笑言，許多人都他有誤解，「好多人以為我好熱情，但其實我個人好冷淡，我有個朋友send咗個message俾我，話我係情感缺失，真係好貼切。我真係好少有情緒起伏，演戲唔計啦，係講緊我平時生活，如果依家呢度爆炸，我一定係戇居居坐低望下咩事嗰個。」龍文康在旁不停點頭，「其實佢個人好怕羞，唔係太鍾意表達自己感受。」秋生解釋指，他的情感缺失來自於成長。「跟爸爸有關？」我問。他說：「同好多事都有關嘅。」

Make up：Jolinn Ng（Anthony）、陳明朗、Patsy Leung（龍文康）

Hair：Taky Chung@Fifth Salon（Anthony）、Evan Wong @Fifth salon（龍文康） 

場地提供：香港演藝學院