姜大衛50年前迷人笑容合輯片爆紅：我又瘦又矮，係生得有性格

現年70歲的姜大衛（John哥），近年較常在電視劇中看到他的身影，許多新一代都不知道，其實早在七十年代時，John哥是紅極一時的邵氏武俠片小生，與狄龍大哥經常合作，以迷人到極的笑容秘殺當年不少女心。

早前有內地網友將John哥七十年代紅透半邊天的作品，混剪成一段精華，當中包括了其名作《報仇》、《叛逆》、《後生》、《小煞星》、《馬永貞》及《游俠兒》等。John哥早前接受訪問時笑言：「連我自己都搵唔返呢啲片段啦，好在後來有出VCD，仲有以前啲錄影帶咋！」他驚訝網友竟然可以找到如此多舊片段之餘，亦提及當年自己之所以有機會拍武俠片，全因張徹導演對他寵愛有加。

相信大家都知道，大衛哥出身於演藝世家，其父親姜克琪、母親紅薇及繼父爾光都是演員，而他與其兄秦沛和同母異父的大導演弟弟爾冬陞都是影視圈中人。4歲已經開始演戲的他，曾經以童星身份在五十年代演出《馬路小童星》等電影，期後於1966年加入邵氏公司擔任龍虎舞師，隨即被著名武俠片導演張徹相中邀請他擔任演員。「張徹導演緊係好錫我啦，我個型只係特別，唔係話靚仔，係生得特別有性格，同以前嗰啲當紅小生唔一樣。」大衛哥指，以前武俠片最興盛的年代，流行用大隻仔男演員，「即係高高大大，好似《獨臂刀》王羽嗰種呢！我個型本身係平平無奇嗰種，所以當時一拍電影，外型上有轉變，觀眾就覺得好大差異囉。」

近日內地網友將大衛哥七十年代的經典角色混剪成片段，片中最常出現的就是他的招牌小酒窩微笑，「我當時拍過一部戲，導演話我唔笑得，只可以去到尾先笑一下；但又好奇怪，我第一部做男主角嘅戲《游俠兒》，張徹導演要我由頭笑到尾，到臨死前都要笑，我相信導演係有安排嘅。」不過，當提及網民大讚他的笑容迷人得「殺死人」，他隨即說：「邊有人讚自己迷人㗎！我絕對唔算靚仔啦！勉強啲講，我只係生得有性格，係上天賜俾我。（咁你覺得你同狄龍外型上分別屬於咩類型？）佢咁大隻，高高大大，我？咪又瘦又矮囉！咁我同佢緊係唔同，如果唔係都唔會捧晒兩個人啦。」

出名謙虛的John哥，雖然現時仍演出不少電視劇，不過他自嘲造型設計上要「扮後生」，不如以往拍戲時的黃衫白褲型他look，「我依家呢個年紀，監製覺得我造型方面一定要係smart casual，俾人感覺係要心態年輕，但我個人就好老啦，我專登留個花白頭嘅，但衫就young look囉！」