【死侍2】賴恩雷諾士搵碧咸谷新片　試映獲讚好睇過《復仇者3》

荷里活型男賴恩雷諾士（Ryan Reynolds）主演的超級英雄電影《死侍2》（Deadpool 2）下星期就上映，近日宣傳攻勢一浪接一浪，出名愛玩嘢的「死侍」，繼上次找來樂壇天后Celine Dion合作，今次又有巨星為他坐鎮，對方正是「萬人迷」碧咸（David Beckham）！

賴恩與碧咸合作拍短片宣傳《死侍2》，片段一開始看到碧咸正在欣賞上一集《死侍》，須知道「死侍」把口臭到無朋友，開口夾著脷經常得罪人，剛巧碧咸看到「死侍」正在嘲笑自己的一幕：「有冇聽過碧咸講嘢？佢好似吞咗成罐氦氣咁」。碧咸除了出名靚仔與球技了得，他的一把雞仔聲亦同樣為人津津樂道。

睇到呢度，碧咸當然嬲嬲豬，「死侍」就傳短訊給他賠罪，但碧咸唔領情，「死侍」就帶住禮物──牛奶同餅乾殺到上門，但就慘食閉門羹。之後他帶住一大束汽球，仲吸埋氦氣變聲去氹碧咸，依然失敗；再之後出動成班樂手唱冧歌都冇用，最後送上兩張意大利對荷蘭的世界盃門票，才令碧咸笑逐顏開。（註：意大利與荷蘭都無入今屆世界盃決賽周）

不過，碧咸話冇怪過「死侍」恥笑佢雞仔聲，反而話賴恩最應該道歉的是拍埋一堆爛片，例如《綠燈俠》（Green Lantern）及《衰鬼刑警》（R. I. P. D.）等，最後再送多一次閉門羹。

此外，《死侍2》昨晚在美國舉行優先場，不少觀眾事後在社交網站分享感受，由於有保密協議，當中不能涉及劇透，幾乎一面倒好評，不單比上集更搞笑、動作場面更出色，更有人大讚比《復仇者聯盟3：無限之戰》（Avengers: Infinity War）更好睇。