【瘋人院逐個捉】潘紹聰赴泰國猛鬼醫院靈探　唸經引誘靈體埋身

以靈探恐怖經歷為主題的韓國鬼片《瘋人院逐個捉》，講述多名青年相約到號稱韓國最猛鬼地點的「昆池岩精神病院」進行靈探。據不時到多國猛鬼熱點靈探的本地靈異節目《恐怖在線》電台DJ潘紹聰（Edmond）所講，其實要數猛鬼熱點，泰國、東南亞一帶比韓國更多更恐怖，而他本人更曾親自到訪泰國一家極猛鬼的荒廢醫院，以及日本著名鬼屋「活魚酒店」，親身感受過有幾猛。

日本活魚酒店廢墟

令鬼王印象難忘的靈探經歷，就是他多年前曾帶攝製隊入內拍片靈探、位於日本千葉縣東金市的「關東第一鬼屋」活魚酒店廢墟。據資料所講，這間「活魚酒店」原名是「油井グランドホテル(油井Grand Hotel)」，由於建築物頂部貼上了「活魚」兩個大字，於是被人稱作活魚酒店。「呢間荒廢酒店係日本出晒名嘅關東第一鬼屋，有傳因為有個女學生喺入面俾人謀殺，於是酒店生意就一落千丈。」翻查資料，原來於2004年12月22日時，一名叫香織的女生跟朋友唱卡啦OK後，被5名青年強行拉上車，期間她被搶去身上約11萬日圓，更被人輪姦及虐打，包括用火燒面、勒頸及電擊將她虐待至死，後來5人合力把屍體運到當時已荒廢的「活魚酒店」附近的草叢。

由於該間酒店在日本早已盛名，於是Edmond把帶同攝製隊到場拍攝，「當時我帶咗個感應到靈體嘅人一齊去，一入去就已經見到嗰個女學生，我哋去之前其實搵咗嗰個被殺女學生張相，仲print埋出來擺喺現場做儀式。我當時帶埋女拍檔入去，我哋一邊做儀式佢就一直爆喊，佢當時同我講，話覺得隻女鬼想進入佢身體，想用佢把口講嘢，所以佢不停喊。」他指，現時「活魚酒店」已被日本警方封鎖，嚴禁所有人進入。

【瘋人院逐個捉】有對手　真實凶宅拍攝《索命鬼屋》嚇到觀眾瀨尿

【瘋人院逐個捉】韓國恐怖鬼屋真實事跡　第一身拍攝荒廢精神病院

泰國猛鬼醫院

據Edmond所講，他早年曾到泰國一家遠離曼谷市中心一個多小時車程、盛傳極猛鬼的荒廢醫院拍攝紀錄片，「我哋之所以去呢度拍，係因為呢間醫院起咗好耐都起唔到，傳聞因為呢個地方被詛咒。」他指，當地人指那間醫院的原址，以前是農業用，用作種米和稻，「點知後來有個商人話要喺呢度起醫院，將原本農地全部剷平，有人話佢呢個舉動激嬲咗地神，令到呢個地方被詛咒，所以原址係起咩都起唔成，結果間醫院起來起去都起唔到，一時就係有工人發生意外，一時又起起下倒塌。」

Edmond與攝製隊奉命入內測試是否真有靈體存在，於是他便帶同和尚大師一同入內靈探，「當時佢一路喺度唸經，我手就拎住一嚿糯米，因為當地人認為糯米可以招鬼，咁當時嚿糯米就吊住條繩，類似玩靈擺（靈擺是指連結你的潛意識，透過人類身體和靈擺顯化出來的肌理現象測試靈體），我同師傅一齊坐喺一個角落，佢一開始唸經，我手上嚿糯米就不停異常地搖擺。當佢搖得好勁之際，師傅就大叫『要停啦』，因為再咁落去會觸犯神靈。」他指當時現場有工作人員將整個情況拍攝下來，「冇得呃。」