【復仇者3】陳奕迅做首映嘉賓合照「中槍」　陳式幽默慘被指無禮

Marvel電影《復仇者聯盟：無限之戰》亞洲之旅於昨日去到上海站，當中有導演羅素兄弟帶領一眾演員︰鐵甲奇俠羅拔唐尼（Robert Downey Jr.）、蜘蛛俠湯賀蘭（Tom Holland）、變形俠醫麥克雷法路（Mark Ruffalo）、洛基湯赫度斯頓（Tom Hiddleston），陣容強勁。
有貴賓到，上海迪士尼方面都不敢怠慢，早就安排陳奕迅、容祖兒、張靚穎、張杰、炎亞綸等等撐場，雖然各人表演唱歌都好理所當然，但網民覺得作為Marvel十周年活動以唱歌作序幕有點格格不入，但最惹嬲內地網民的反而是一張大合照。

話說這個Marvel十周年慶典，主角當然是一眾遠道而來的Avengers成員，不過迪士尼為營造歡樂氣氛，特意請來陳奕迅、容祖兒、張靚穎、張杰、炎亞綸等獻唱。其實電影並冇咩主題曲或者宣傳歌，所以眾歌手上台都係唱番自己歌，而打頭陣的Eason更唱出廣東歌《Let It Out》，身為香港樂迷知道偶像咁撐廣東歌當然高興，只係對內地網民及嘉賓嚟講就真係唔知聽咗啲乜。

相關文章

陳式幽默唔多受

唱歌環節，網民都半推半就冇怨言，但到後來Eason的對話就開始惹來不滿，話說他用英語在台上笑說︰「今天被邀請來見到甚麼……超人，很高興！」有人在台下便提醒是復仇者聯盟，Eason便更正︰「Super Hero 超級英雄， Whatever」有網民聽到立即著咗，話超人係DC的！更有人受不了這種陳式幽默，說︰「再看不到下去！」

「不懂 你的黑色幽默」只是前奏，奏下去是大合照都中槍，事源大會隨後在微博上載一張全體大合照，而焦點就在Eason企中間。網民覺得當背後張大型海報都是Iron Man企中間時，大大個羅拔唐尼在場竟然要靠邊站？即使不是他，在場還有蜘蛛俠、洛基、變形俠醫等，怎會由跟電影無關的Eason站正中？事實上呢下Eason真係無辜，根本係活動去到最後，一邊是電影演員，另一邊是出席歌手來個大合照，Eason站在兩邊人的中間都好合情合理。又其實如果Eason能夠跟羅拔唐尼一齊企，出來效果又真係冇咁突兀，無論點企都好，呢次Eason係硬食咗一下，冇計。