【金像獎2018】鄭中基游學修唱雙簧　鄭妙論：想攞男配要學收聲　

每年香港金像獎的頒獎嘉賓都妙語連珠，鄭中基與游學修負責頒發最佳男配角，後者一支箭衝上台，但腳受傷的鄭中基就撐著拐杖施施然出場，他介紹自己做「陳暴龍」（鄭中基在電影《低俗喜劇》的角色名字，他憑這個角色於2013年勇奪最佳男配角），聲稱看了這麼多年金像獎，得出個「如何奪得最佳男配角的定律」。

「今屆提名係咩人？全部都係衰人，冇一個好人。姜皓文、林家棟，綁架妙齡少女，衰人。秦沛，個女都咁大，仲四圍溝女，衰人。倉田保昭先生，強迫鄧麗欣打空手道，賤格！」鄭中基語出驚人，引得全場大笑。游學修反駁他牽強：「姜皓文喺《拆彈專家》係好人，倉田保昭喺《蕩寇風雲》都係好人，仲有你呢暴龍哥，你都攞過男配角，咁好人。」

鄭中基又妙答：「游學修，短短兩句說話，將我頭先講嘅一番話變成廢話，你要攞到提名嘅話，游學修我諗你要改名，要學收（修）聲！」鄭中基玩食字爛Gag，引得全場再次拍掌大笑。