【鮮浪潮】杜sir勸舒淇唔好做導演　「厭惡性行業嚟㗎！」

第十二屆鮮浪潮國際短片節今日（6日）正式開幕，鮮浪潮電影節有限公司主席杜琪峯（杜sir）、舒淇、王宗堯、日本著名獨立片導演矢崎仁司及《翠絲》導演李駿碩均有出席開幕典禮。

作為「鮮浪潮」發起人的杜sir，由2005年13年來一直支持這個培育後輩的短片比賽計劃，今日他上台發言時說：「好開心政府俾呢個平台出現，亦好多謝舒淇終於嚟到撐場，因為我請咗佢好多年啦，都唔得閒！」

期間舒淇被問到會否考慮跟丈夫馮德倫一樣做導演，她笑說：「吓，唔好啦掛？」在旁的杜sir則說：「做導演啲咁辛苦嘅嘢留俾我哋做啦，厭惡性行業嚟㗎！」舒淇笑言現時仍然想專注演戲，更指有興趣演出新晉導演的短片作品，「其實拍商業片反而會令演員冇咩發揮，如果佢哋考慮用我，我咪有得考慮囉。」

今年的鮮浪潮短片節將於4月6日至21日舉行，將會放映46部本地及國際影片，包括開幕電影《無伴奏》、開幕短片《吊吊揈》、以及分成10個包括「切肉不離皮」、「追尋與失落」、「暴烈溫柔」等主題的短片節目。

節目詳情可瀏覽www.freshwave.hk