【金像獎】影壇書法家曾為《跛豪》寫戲名　杜sir星爺都登門求字

拍攝一部電影，牽涉在內的人由導演、編劇、演員、攝影以至燈光等，每個崗位都相當重要，各司其職，但許多人都會忽略書法家這個重要崗位。在電影製作中，書法家一職其實就是美術指導工作的其中一環，由道具上的文字以至於電影海報上的戲名，每一個字都代表著這部電影散發的氣質。
攝影：梁碧玲

回看上個世紀，電影製作沒有電腦輔助，飛紙仔、人手製聲效等趣事屢見不鮮，但時至今日，當一眾電影人都善用科技打造電影效果時，仍然有人為一個好看的戲名而上門求字，登門造訪本地知名書法家華戈，為電影揮筆寫下絕美戲名。

由砵蘭街起家
「香港華戈書道學會」創辦人華戈（馮兆華），是八十年代的街頭書法家，現時的「美心皇宮」、「英華書院」都是他的作品。這位生於內地的華師傅，自小學習書法，80年代來港後以「寫大字」為生，當年香港盛行手寫的「白手招牌」，「以前寫個招牌真係搵命搏，喺天台用條繩縛住腰，就咁懸垂落去，半空寫招牌，唔易做啊……日日著住對白飯魚，帶住幾個鏟仔、幾桶油同幾支小毛筆，周街問人使唔使補字。」華師傅形容那段時期為「行街」，直至後來他於砵蘭街開檔，才開始涉足電影圈，「唔係我走入電影圈，係班友捉我入電影圈啊（班友即係邊個？）咪電影人囉，嗰陣有行家話砵蘭街好多寫字檔，有朋友話人有人想3,000蚊轉手個檔口，咁我最終用2,800蚊頂咗檔嚟做。」

當年的砵蘭街，華戈形容是三教九流之地，「嗰陣好多電影人去『體驗』生活，有啲導演啊、美指啊、演員啊都有，洪金寶、成龍、黃百鳴都經常去『體驗』，會叫人幫電影寫下字。」華戈第一次為電影提字，就是呂良偉主演的《跛豪》，「其實幫部戲寫字用咩字體，好講部戲個內容，好似黑幫片《黑社會》系列咁，就用香港舊招牌時時見嘅北魏體，即係《三國演義》用嗰款，字款比較霸道，每次接戲我都要先睇過故事大綱，知佢講咩先捉到個感覺。」

評王家衛︰「呢個有才華嘅人就係扮嘢囉！」
華戈在本地電影團裡，地位是非一般的超然，曾經為《跛豪》、《倩女幽魂》  《半生緣》等電影為戲名提字，更是周星馳電影御用書法家，曾經為《逃學威龍》、《食神》及《西遊記》等寫戲名，不過，一提到近年曾於《一代宗師》、《2046》及《花樣年華》等著名電影合作的名導王家衛，華師傅便似乎有點氣憤：「王家衛係有料嘅，但呢個有才華嘅人就係扮嘢囉。起初佢現場睇我寫就話『嘩！華師傅好嘢！』到後來啦，佢通過一個中間人搵我，要一邊寫一邊影番去俾佢睇呢，就扮嘢啦！佢要表現得比直接嚟搵我嗰個中間人叻嘛！兜兜轉轉，等我寫嚟寫去始終又係要番第一張……《2046》之後我直頭諗過唔再同佢合作，有錢唔係大晒嘛！」

雖然華師傅語帶不憤，不過他仍然難忘為《一代宗師》整條古裝街提字的經歷，「佢哋要我直頭去開平個片場到睇場，要我寫晒當時搭嗰條古裝街所有招牌。因為以前我哋寫招牌呢，咩舖頭都有分用咩字體，咁所以佢一條古裝街就要分好多種唔同字型。」據他所講，過去不同商店的招牌，所用的顏色和字型都各有不同，「譬如診所、醫館等常用白底紅字，武館及麻雀館則常用粗大的北魏體，當然王家衛佢要咩字型我照單執藥，但我好強調，唔同行業所用嘅招牌字型都唔同，條古裝街有旅館，我強調一定要用顏體，睇落圓潤啲。」