【復仇者3】少女捨畢業舞會陪男友睇戲　網民激讚：世上最好女友

「好女友」定義好廣泛，肯陪你日日食譚仔或麥記算一種，入得廚房出得廳堂亦算一種，唔港女冇公主病都算一種。而對於近日一位美國男孩來說，他的伴侶肯定稱得上「最佳女友」，事關在4月27日，即《復仇者聯盟3：無限之戰》（Avengers: Infinity War，下稱《復仇者3》）北美上映當日，其女友寧願放棄對美國少女來說好重要的畢業舞會（Prom），都要陪他第一時間入戲院欣賞《復仇者3》，難怪男方要Cap圖放上討論區曬命，獲網友激讚「世上最好女友」。

這位名叫「avery7840」的網民，昨日在有「美國連登」之稱的Reddit討論區上載一張與女友傳短訊的截圖，一開始女友問他「BB，《復仇者》幾時上畫呀？」、「官方上映日期係4月27日，你點解咁問？」、「我有個提議」、「關於？」、「XXX同爹地媽咪都想我去畢業舞會，但我唔係太想去，我寧願著靚靚影幾張相交差，之後同你去睇謝，你想唔想咁呀？」

女友其中一句「i have an idea」正是《復仇者3》第一版預告中，神盾局局長Nick Fury所講的第一句旁白，網民話「見字有聲」，大讚呢位女友人品好仲有Sense，仲叫「avery7840」拿拿臨同女友結婚。不過亦有網民理智分析，指高中畢業舞會一生人只有一次，應該替女友著想，或可選擇陪女友出席舞會後再去睇戲，兩全其美。