【廉政風雲】林嘉欣劉青雲演夫妻易溝通：我同佢都係怪人

林嘉欣在2010年結婚誕下女兒之後就鮮少參與電影演出。雖然如此，但是有林嘉欣參演的電影均是甚有水準，2015年與影帝張家輝合作《陀地驅魔人》口碑更非常不俗。劇知林嘉欣將會與劉青雲張家輝合作拍攝新戲《廉政風雲》，真係令人期待。

今日林嘉欣出席中環LV活動時提到這次合作是受到導演麥兆輝的邀請。林嘉欣：「麥兆輝搵我嘅時候，就話我同青雲比較多感情戲，所以就話我哋要多啲溝通。（點溝通？）我哋都ok㗎，可能我哋都係怪人啦，2個都怪怪地。我自己覺得我自己唔係好正常，佢都唔係好正常，所以我哋都啱傾計㗎。」

問到劉青雲有甚麼「怪」時，林嘉欣説：「我覺得好嘅演員唔需要正常，亦唔都需要顧及人哋覺得你正唔正常。譬如青雲咁好戲，係因為佢好鍾意觀察。佢唔係一個多說話嘅人，但係佢觀察力好好。之前咪喺filmart有記招嘅，咪有個台推出嚟會噴煙嘅。原來係有個人匿埋係入面，好好笑因為裏面好細，但係入面個人好大隻。嗰時好多鏡頭，咁青雲見到第一句就話：『你喺度做咩吖？』哈哈。呢個係一個好奇心嚟㗎，佢冇麻木到自己。所以點解我話劉青雲係有趣，係怪嘅，但係佢亦係一個好演員。」

至於問林嘉欣她有甚麼「怪」，她就說：「我自己？我都唔知，呢個要問我先生先得。哈哈，佢比我清楚好多。」