成龍話黃大仙冇人睇？　其實林正英秋官都演過仲好經典

成龍昨日出席全國政協委員13屆會議時，提到港產片「太Local」，在內地或外國冇人識，票房唔會好，又舉例話拍「黃大仙」真人版電影，只能夠在香港上映，因為內地觀眾唔了解，更遑論會有外國人欣賞。
不過，原來「黃大仙」的故事，早於上世紀90年代已改編過電影，更找來當年紅爆中港台的林正英擔正，但由於是低成本製作，粗製濫造下拍唔出好質素，亦成為林正英被遺忘的作品之一。

1992年林正英拍了12部電影，由於其道長形象深入民心，當中票房較凸出嘅有《音樂殭屍》及《新殭屍先生》等，個個都睇殭屍片，唔通個個都鍾意睇殭屍片咩？正是，相信十個觀眾有九個都唔記得、甚至唔知有一套《黃大仙》，由杜文波執導、司徒安編劇，林正英、關海山、黎燕山及谷峰等主演。

今時今日，要搵返呢套戲睇都有一定難度，故事講述黃大仙本乃金龜托世，因擅自拯救凡人而被王母娘娘責罰眨下凡間，投胎一農戶人家並改名黃初平，獲觀音指點向大師拜師學藝，凡人又變返神仙，並自稱「黃大仙」四處遊歷救人，有日故鄉遇早災，黃大仙以血化雨救災，最終又再成仙重返天庭。

有求必應的「黃大仙」其實並非來自香港，黃初平是真有其人，於古代三百多年時出現，在山中修煉得道而成為道教神仙、後來有傳說指19世紀末，黃大仙奉玉帝旨意下凡顯靈，導人向善而吸引大批信眾追隨，當年瘟疫於廣東地區蔓延，不少善信向黃大仙求醫問方，所以在香港普及。

不單林正英演過黃大仙，連鄭少秋亦曾於1986年出演過劇集《黃大仙》，講述施雨神赤松子擅自下凡停雨，被玉帝貶為庶民黃初平，與謝賢飾演的奸角飛龍太子鬥個你死我活。秋官被黃大仙與林正英的最大分別是劇中美女如雲，秋官版本不單獲陳秀珠飾演的公主垂青，身邊仲有鄧萃雯、黎美嫻及莊靜而等美女。

會救人、有氣量、夠道義、好身手，加上身邊仲美女如雲，成龍大哥會否考慮翻拍電影版，出演有求必應的黃大仙，身先士卒將這位標誌住香港文化的代表人物在中國、在四海、在全世界發揚光大？