【程小東．專訪】最欣賞發哥華仔捱得　新演員冇經驗「好易淘汰」

不經不覺，亞洲電影大獎已踏入第12屆，對於促進亞洲電影人之間的交流與互相肯定，均起著莫大作用。而今年亞洲電影大獎以「武動亞洲」為主題，開宗明義以動作片作為主力推廣的對像，評審主席亦很理所當然地找來香港著名導演兼武術指導程小東先生擔任。

早於1992年便憑《新龍門客棧》奪得第29屆金馬獎最佳武術指導，及在2002年憑《英雄》勇奪第22屆香港電影金像獎最佳動作指導的程導演，多年來對推廣動作片不遺餘力。香港多年來以動作片在國際電影圈中佔有一席位，李小龍、成龍、甄子丹等武打巨星甚能代表香港電影圈。然而，近年武打明星似乎有老化情況出現，新一代的動作演員買少見少，對於此情況，程小東導演也感到無奈：「動作演員係好難培養，打得、睇得、演得，仲要計觀眾緣，要成功真係好難。譬如甄子丹都等咗成廿幾年先撞到個好嘅作品彈起，又好似吳京都係咁，全部都起碼二十年歷史先有機會紅，所以係好難培養一個優秀嘅動作明星。」

雖然動作演員不易培養，但程導並不擔心斷層的問題：「雖然動作演員唔多，但一直都有。好似趙文卓、張晉、吳京等等都上位，只不過動作演員係相對需要時間去發圍。」不過程導舉這些例子似乎都是內地人，而且有一定年紀。香港新一代動作演員數來數去也只有陳嘉桓Rose算比較多人認識，似乎情況仍不甚樂觀。

演員新不如舊　因冇發哥、華仔咁捱得？

除了動作明星外，程導演在電影圈打滾多年，合作過的明星全部多不勝數，說到最令他敬佩的香港演員，程導想了想，最後說出了周潤發及劉德華兩位影帝級人馬：「佢哋好捱得，而且演技精湛，更重要係唔會因為自己身份而驕傲。發仔可以拍好多個唔同嘅表情畀你揀，佢嘅專業同演技令我合作得非常舒服。華仔雖然唔係科班出身，但佢會努力做好每一個動作。以前嘅演員係好肯努力做好每一件事，就算唔係動作演員，遇到我都會希望我度好招比佢哋，完全唔怕辛苦。」程導又指現在的新演員相對之下會怕辛苦，最好就以替身代替，某程度上導致新不如舊。

為何再見不到如哥哥、星爺般的明星？

以前港產明星如哥哥張國榮、星爺周星馳兩位與程導合作過的巨星都甚具個人魅力。程導作為合作人，有感現在港星的魅力不如舊時，某程度上就是因為少了刻苦耐勞的特質，與入行前的「相關經驗」：「以前明星好多都由低層做起，訓練班一級級上，由木人巷出嚟，本身演技同魅力上已經浸淫一段時間。而家嘅明星好多時都食快餐，以經理人公司催谷，但往往冇電影上嘅技巧與知識，好容易被淘汰。」不過近年很多有潛力的新演員，都是讀電影系或表演系出身，雖然沒有經長年浸淫，但在表演上已有一定知識，相信以前經理人公司流水作業式的催谷明星現像已得緩和，也許會改善港星的魅力問題？

更多訪問照片：