【黃子華】《亞李．爸爸兩個大盜》達明子華棟篤式演繹壞人唔易做
提起黃子華好多人第一時間諗起「棟篤笑」，如果較年輕的朋友，可能以為這個名詞只配子華神，但其實要數棟篤笑經典，黃子華身邊一定要有另一半，就是張達明。他們二人早在20年前已合作，一唱一和齊齊講笑話，更合拍電影《亞李．爸爸兩個大盜》，或許好多人已忘記甚至從沒看過這部作品，那麼你便走寶了。
全盛時期的黃子華加張達明可以有幾好笑？《亞李．爸爸兩個大盜》就答到你。這二人的棟篤笑組合，隨住達明身體抱病而慢慢變成只有黃子華的獨腳戲，也令他今時今日還以《棟篤特工》之名拍電影，後生一輩說到「棟篤」甚至只聯想起子華神，實在可惜。其實達明都好鬼馬，唔信？自己去搵套《亞李．爸爸兩個大盜》看一看就明白了。
這部1998年的電影，在當年不算熱話，票房也不過一般，但劇情在今日看來，其實笑中有淚，而且更十分應景。子華同達明，所演正是貼地到不得了的小市民，更甚的可以說他們是一無是處的廢人，在社會上生存非常困難，還要遇上十足的不幸，你話點算？不知大家有否想過，自己要被逼到一個怎樣的地步，才會想去殺人放火打家劫舍？如果到某一天，人又老錢又冇、老婆又跟人走佬，你能拿出勇氣去做壞人嗎？這條問題，正正就是《亞李．爸爸兩個大盜》的重心，而兩位主角，就以非常搞笑的方式，透過電影告訴大家，壞人其實唔易做。
就好似其中一幕練膽戲，現在叫你拿起刀去殺一隻狗，做得嗎？可能一來就太高難度，咁轉一轉對手，你能徒手「撳」死一隻小烏龜嗎？諗一諗都覺得冇可能……而結論是，就算當你立下決心要做壞事，個天都未必幫你，機會還是留給有準備的人，起碼你想打劫銀行，都要考咗車牌先。
《亞李．爸爸兩個大盜》全片充滿黑色幽默，笑位連連。單是兩個主角名已夠抵死，李家成（張達明飾）和肥佬黎（黃子華飾），現今電影圈相信都沒太多人夠膽這樣玩。此作是鄺文偉首部自編自導作品，他打滾影壇多年，過去主力擔任編劇，其筆下有《終生大事》、《999誰是兇手》及鬼片《七月十四》等，但都未去到《亞李．爸爸兩個大盜》般跳脫。當然，電影好睇除了劇本和主角本身夠瘋狂，還要有大量配角加持，如羅蘭姐演的女警，簡直是畫龍點睛，一出場已令人笑到反肚。此外，八兩金做的真惡人、黎耀祥做的滑頭小子、雷宇揚幾句對白客串，全都令人看後難以忘掉，值得一睇再睇。在看此作時，不禁令人想起另一套由吳鎮宇主演的舊電影《旺角揸fit人》，兩者好有異曲同功之妙。