【棟篤特工】黃子華誓要脫毒　盡地一煲要做賀歲片票房一哥

黃子華向來有「票房毒藥」之稱，這個稱號並非浪得虛名，向來由他擔正或執導的電影都票房慘淡，最經典算是2002年他自導自演的《一蚊雞保鑣》，貫徹如一，埋單收11萬。不過近年子華神人氣今時唔同往日，現在出來講兩句說話，拍條短片，都大獲好評，未知今次首度擔正的賀歲片《棟篤特工》，但從今次的宣傳攻勢來看，似乎極大機會脫毒呢！

黃子華自嘲︰「拍呢啲戲，拎呢啲票房」

其實以子華的人氣計，真係冇乜可能會成為票房毒藥，不過時也命時，由子華主演的好幾部電影，票房又的確麻麻。係咪當時人氣未夠？又唔係，就講子華神其中一個高峰《男親女愛》（2000），收視破晒紀錄的50點，氣勢一時無兩。

不過同年上映，跟梅姐梅艷芳合演的《男歌女唱》，票房就承接唔到呢股氣，只收127萬港幣，兩者好似脫軌地生處平行宇宙咁。到2002《一蚊雞保鑣》，自編自導情況更慘烈，只收11萬。就連子華自己都在棟篤笑內自嘲一番︰「有個老細搵我拍戲，佢話華仔偉仔幫我拍嗰啲戲，你就幫我拍呢啲戲。你搵我拍戲，使唔使講到咁白？所以華仔偉仔個票房就嗰啲，我哋就好盡責地有番呢啲票房。」

【棟篤特工】新海報再向007致敬　佘詩曼揸臘腸箍實黃子華

【棟篤特工】黃子華佘詩曼黃金拍檔賀歲　有冇機會打破票房宿命？

宣傳攻勢落足本

相比起過去的出品，今次《棟篤特工》明顯由製作到宣傳都認真好多，先講海報，先後公開兩張惡搞007的海報見大家，都似模似樣唔低俗。除了海報，連主題曲都貫徹地007落去，找來欣宜獻唱，唱出特務風味，至於子華的featuring，學佢所講，志在破壞。不過成件事就見心思，跟電影主題緊扣。去到首映日，子華更與佘詩曼乘搭直昇機去到會場現身，唔係話做特工就搭直昇機，不過搭埋就再似啲。

【棟篤特工】黃子華拍片鳴謝28位串星　「多謝大家拯救票房毒藥」

28星逼爆畫面  入場數星星都抵

電影即將上畫，上星期子華便自拍短片放上網，要親自去答謝每日幫電影客串過一角甚至一幕的28位朋友，當中更不乏影帝、影后、天后、視后級演員，驚喜十足。28位巨星包括鄭秀文、楊千嬅、許冠文、譚詠麟、張智霖、蔡少芬、鄭丹瑞、鄭中基、吳君如、草蜢、王敏德、鄧兆尊、張繼聰、張達明、苑瓊丹、盧海鵬、許紹雄、林雪、羅蘭、鄭欣宜、林子善、張國強、趙榮、詹瑞文、湯鎮業、盧惠光、白只、專家Dickson。全片就只有子華自己拍自己講，但已經相當吸引，好期待。

同期對手你點揀？

其實今年都有唔少賀歲片競爭，唔計外語片《黑豹》，華語片對手分別係《我的情敵女婿》、《西遊記 ‧ 女兒國》、《捉妖記2》。《我》由葉念琛執導，賣點係任達華同劉嘉玲，這個局面，子華有得揮！至於後兩部，雖然又梁朝偉、郭富城，不過似針對內地市場，要揀部同聲同氣的，子華神似乎係首選。所以大家密切留意開畫票房，能否一次過脫毒，就睇呢鋪！