【超人特工隊2】Pixar事先張揚　情人節平昌冬奧有新預告睇

繼上星期一在「超級碗」內有大批電影釋出最新預告後，今個星期三情人節當日，今年暑期矚目動畫《超人特工隊2》（Incredibles 2）亦將會在另一體壇盛事《平昌冬奧》內有新搞作，相信會發放全新預告。

《超人特工隊》於2005年上畫，電影最後出現了超能BB，當時大家已認定會有續集，斷估唔到一等要等足13年，要今年暑假先有得睇。電影自宣布啟動後，大家都拭目以待。咁有幾期待呢？上年底11月推出一條先導預告，全片1分鐘都冇，其實冇乜內容，由超能BB做主角，講佢以一對鐳射眼將《Incredibles》招牌個「i」字切割成「II」，就係咁，至今已吸納到7,900萬人次瀏覽，不得了。

昨日，Pixar便率先賣廣告，會在今年情人節（14/02），在平昌冬奧上公開最新預告片。廣告片上，見到仔仔小飛化身速度滑冰選手，既合乎主題又襯晒佢擁有的特異功能。而鏡頭一轉，就見到一家五口的超能家族，排排坐，安坐家中睇冬奧，隨後就播出上集片段同告知有新造型睇的消息。雖然冇講到明係咪新預告，但都已令人非常期待，記得情人節Mark實你另一半齊齊睇《超人特工隊2》全新預告。