【西遊記女兒國】郭富城諗過唔再拍　梁詠琪化妝化到想打導演

今年的賀歲片《西遊記女兒國》，昨晚在九龍站舉行慈善首映禮，一眾演員都有盛裝出席，包括郭富城、馮紹峰、趙麗穎、梁詠琪、趙麗穎、小沈陽、羅仲謙、苑瓊丹、蘇麗珊等，都有出席。其中馮紹峰、小沈陽同羅仲謙仲以戲中的大肚造型登場，相當搞笑。
攝影︰陳順禎

GiGi介紹自己角色係國師，但由於特技化妝太勁，搞到朋友入場睇完都唔知有佢份演。GiGi︰「今次好認真，搵到荷里活級數嘅特技化妝師製作，不過過程又愛又恨，見到出來效果好好就愛，但拍攝時因為8點通告而要2點起身化妝，化足5個幾鐘，那刻就好想打導演。」導演鄭保瑞笑言想打佢的人不時都有，但他解釋為GiGi設計這個造型，不是想整醜她，而是想觀眾看到不一樣的梁詠琪。

GiGi要捱肉酸妝，演孫悟空的郭富城都唔好受，又要化妝仲要黐毛，城城表示拍完第二集，早就決定唔想再演。「因為個妝太辛苦，早就決定唔再拍，但導演同老闆話四師徒入面，其餘三個都已經答應了，差你一個。然後我再睇埋劇本，自己都被打動，點都要拍埋啦！」雖然答應演出，但苦還是要捱，最難捱是無啖好食。「趙麗穎一到片場，就會準備好多零食，不過我同謙仔得個望字，因為驚一食就會整花個妝。」又要捱時間化妝，仲要捱肚餓，呢套戲真係唔易拍。