【格雷3】男主角「被」陪睇試片：保鏢睇住我扮高潮好尷尬

話題十足的《格雷的五十道色戒3》（Fifty Shades Freed）明日上映，男主角占美杜倫（Jamie Dornan）較早前已於電影公司的倫敦辦公室率先欣賞製成品，不過占美全程被大隻男保鏢傍實，不單沒法專心欣賞自己的演出，仲頻頻上廁所，成套戲只睇得一半，究竟搞邊科？

日前占美上名嘴Jimmy Fallon的清談節目時，提到當日睇試片時，由於保密理由，電影公司安排一名男保標陪睇，以確保他沒有盜錄。兩個大男人結伴睇《格雷》，令占美好生尷尬，於是乎邊睇邊灌啤酒壯膽，當播放情慾場面時，順便可以「借尿循」離場消除尷尬：「成場戲不停去廁所，所以有半套戲都冇睇到。」

睇到最尾，占美頂唔順畫面中的自己，決定提早離場。你覺得尷尬，但保鏢就大讚他表現出色，仲擊掌以示鼓勵，令占美更加尷尬到爆：「你睇我扮高潮扮足兩粒鐘。」訪問中占美提到與女主角狄高達莊遜（Dakota Johnson）情同兄妹，笑言拍攝《格雷》三部曲期間，對方有過好多段感情，順便強調自己是人夫，對老婆忠心耿耿。