【金像獎】上屆影帝影后家棟紅姐撐今年港產片 「仲激烈過上年」
ViuTV今天假紅磡嘉里酒店舉行記者招待會，正式宣布今年《第37屆香港電影金像獎頒獎典禮》將由ViuTV進行免費電視獨家直播，而上屆的最佳男女主角林家棟與紅姐惠英紅均有出席是日活動。
兩位既是影帝影后，亦是金像獎選民之一，又如何看今屆的電影呢？家棟就分享自己工作很忙，之前未有太多時間看電影，不過近日已經慢慢「惡補」：「我近日都有追返睇《相愛相親》、《以青春的名義》幾套戲，我自己睇《相愛相親》覺得好感動，包括三代人嘅關係刻劃得好好！但唔好誤會我拉票呀！我只係啱啱睇完好想分享炸！」至於紅姐就說自己不能透露自己心水之選，因為會影響第二、第三輪的投票，但也分享了一些對今年港產電影的看法：「今年年輕女演員非常厲害，但資深老演員又不容忽視，所以今年女演員之爭都應該會好激烈。」今年港產女演員真的做得很好，年輕的有《29+1》周秀娜，剛剛在香港電影評論學會大獎獲「最佳女演員」的鄧麗欣、《失眠》衛詩雅等，資深的有《相愛相親》張艾嘉、《以青春的名義》劉嘉玲，甚至紅姐本人的《Mrs K》等，演繹都是水準之上，又真的頗難揀！
而提到題材上，兩位都不約而同地表示今年的港產題材比往時更豐富，紅姐說：「今年有唔少感人嘅作品，去到年尾更有啲家庭式小品作品，而男演員方面就偏向動作與警匪片，競爭仲激烈過自己嗰年。」而家棟亦分享覺得近幾年香港新導演的題材愈來愈多元化：「新導演嘅作品多咗關懷身邊嘅人，往時我哋可能全部都係動作，但近幾年係多咗令人感到窩心嘅作品，我都好開心見到呢個情況。」家棟點名提到了將於3月上映的《黃金花》，就是一套以自閉及弱智兒童的電影，近年香港觀眾多了喜歡入場支持這類社會性較強的電影，相信對整個業界來說都是好事！
今年家棟與紅姐都有一些作品有份爭奪獎項，家棟有《獨．誡》、《失眠》、《殺破狼．貪狼》、《狂獸》等，而紅姐就在其最後一套動作片《Mrs K》中擔任女主角，兩位又對自己有沒有信心可以在金像獎中爭一席位呢？上個月獲金馬影后的紅姐就信心十足，笑言：「我對我嘅演出係有信心。」而家棟就稱：「我今年雖然都有4、5部電影，但係咪好突出我又唔敢講，但可以有唔同嘅電影畀我玩已經好好！同埋希望觀眾除咗留意我哋之外，都留意多啲新演員，因為佢哋今年真係好勁！」無時無刻都不忘提攜後輩，家棟作為影帝級前輩，認真唔話得！同時兩位都勸勉各電影人即使沒提名也不用灰心！紅姐話：「千其唔好因為入唔到圍而冇心機，可能出年有機會到你呢！」而家棟亦言其實有時得獎是「鬥長命」：「努力唔係賣點，個個都會努力，只要你有創意、有堅持終有一日會到你。」大家加油啦！