【大師新作】宮崎駿正式復出 3月上映首部CG短片看毛毛蟲大世界
撰文：洪曉璇
出版：更新：
剛剛喺1月5號度過77歲生日嘅日本動畫大師宮崎駿，歷年來經典作品無數，更曾經喺2014年奪得奧斯卡終身成就獎。2013年完成動畫《風起了》之後，同年9月宣布退休，不過佢嘅老友、吉卜力動畫監製鈴木敏夫去年已經透露，宮崎駿準備開拍新一套長篇動畫電影。長篇電影就暫時未有得睇，不過由宮崎駿製作嘅3D短篇動畫《小毛蟲波洛》（毛虫のボロ）剛宣布，會喺3月尾於日本放映。
2013年宮崎駿完成《風起了》後召開記者會宣佈退休，但佢並未全情投入退休生活，近年積極準備首次用3D電腦特技拍攝嘅短篇動畫《小毛蟲波洛(毛虫のボロ)》， 呢日終於傳嚟好消息，短片會喺今年3月21日起於三鷹之森吉卜力美術館放映。呢條短片長14分鐘20秒，由宮崎駿原作、編劇兼導演，係佢首次用CG製作嘅動畫，講述喺黎明時份出世嘅毛毛蟲，學習點樣面對呢個世界。
相關文章
宮崎駿2019新戲給孫仔做最後禮物 「你想活出怎樣的人生」為題
【童年回憶】《天空之城》爆日本社會現象 真經典重播收視勝日劇
呢套短片雖然係呢兩年先開始製作，但原來宮崎駿早喺超過20年前，已經構思呢個故事，不過礙於當時嘅技術所限，所以到早幾年先開始著手製作。呢次佢搵來製作《攻殻機動隊》動畫嘅製作公司合作，相隔4年半再有新作推出，暫時只會喺日本三鷹之森吉卜力美術館放映，相信一定會掀起撲飛熱潮，香港嘅粉絲睇嚟要捕實買機票啦。