【奧斯卡】《Remember Me》奪最佳原創歌曲　許志安與有榮焉

音樂無國界，只要係好歌，有時就算聽唔明嗰種語言一樣可以感動人心。《玩轉極樂園》的《Remember Me》勇奪今屆奧斯卡「最佳原創歌曲」，許志安身為粵語版主題曲主唱，兼戲中阿德配音人都與有榮焉，安仔於《玩轉極樂園》奪獎後，馬上於IG留言道賀。

【奧斯卡2018】《玩轉極樂園》奪最佳動畫長片　Pixar第9度得獎

【奧斯卡2018】《Coco》主題曲《Remember Me》奪最佳原創歌曲

其實早在1月份《玩轉極樂園》於香港上映時，安仔就曾經喺IG轉載一篇KOL偽文豪寫嘅留言，原來佢發現呢首歌官方MV有唔少來自墨西哥嘅留言，大讚安仔唱得好好，甚至比西班牙文版本更精彩！呼籲大家珍惜香港其實仲有好多好歌手！

睇返《玩轉極樂園》粵語版主題曲MV，的確見到好幾個墨西哥網友留言，佢地似乎一開始唔知道係咩語言，留言問：「What language is this? sounds beautiful」有網友用英語回覆係廣東話之後，佢就話：「It's a placer! Greetings from México!」亦有西班牙文留言：「難以置信的版本，這是非常美麗的演繹。表達了很多的感覺。(Increíble versión, que forma tan hermosa de interpretar. Se expresa mucho sentimiento. Gracias.) 」

相信連安仔自己都估唔到，唱隻電影主題曲可以紅到去世界另一個邊端，佢喺IG留言話：「衷心感謝你們支持。」其實正如偽文豪喺留言中所講：「香港人我哋都有好歌手，唱得好要讚、要支持，唔好人哋出外搵食喇，唔撈喇，死咗喇，先嚟珍惜……而家唱得好就要讚，咁先係正確態度！」