【柏靈頓2】英國上畫上足5星期　票房大收決定開拍第三集

今個星期上畫的《柏靈頓2》（Paddington 2），原產地英國早在11月已上畫，票房相當了得，如果計及全球25個城市累收票房，更加已大收近4億港元，足令電影公司提早過快樂聖誕。
不過公司是有遠見的，今年過得開心，都想來年繼續快樂，所以製作公司已與監製斟掂數，鐵定同一班底將會三度作，繼續「熊」霸票房。

始終是英國國寶，《柏靈頓2》在當地票房都向來有保證，所以上畫初期已經係冠軍，可惜隨後受到《正義聯盟》及《左兩爸右兩爸》，一套超級英雄一套輕鬆喜劇的猛烈攻勢，失去兩星期的冠軍。不過英國觀眾都是有「熊」情味的，《柏靈頓2》在第4周戲劇性地贏番個冠軍，頂得住來自由茱莉亞羅拔絲及奧雲韋信合演的《奇蹟男孩》攻勢。

收得，自然要向第三集進發，又其實在《柏靈頓2》開畫前，製作公司已經同監製大衛凱曼有共識，鐵定原班人馬會第三度合作。雖然大計已在口中，但劇本動筆，故事、拍攝地點、場景全部都未落實，一切仍在初商階段。雖然係咁，不過又唔係個個都想拍落去，監製就明言想導演保羅京治繼續執導，但他就坦言未必領情！他說：「不再拍《柏靈頓》的確很可惜，但世上還有很多好玩的事情可以做！雖然很難放手，但我仍會嘗試開拓其他領域。」言下之意，他有可能另尋新發展，不再參與《柏靈頓》系列。到底會唔會係一場套路，還是係最後答案？相信到《柏靈頓3》落實開拍時就自有分曉。