【妖鈴鈴】吳君如執導尋找港產喜劇味 吳鎮宇︰認真拍喜劇慘過死
近年的聖誕或農曆新年檔，吳君如都會以監製身份帶套喜劇俾大家，早前有《金雞sss》，隨後又有《12金鴨》。來到今年，君如換個身份，登上導演一職，一於落手落腳拍番套喜劇俾大家睇，仲出晒面，叫晒好友吳鎮宇、方中信撐場。
見到好友興致勃勃，做朋友的一於撐到底，方中信要打孖笠頭套扮地中海，吳鎮宇要連開夜班加吊威也。鎮宇都做過導演，早就勸戒過對方諗清楚先好去馬。鎮宇︰「佢要自己攞苦嚟辛，都阻佢唔到。」雖然把口講到咁，其實鎮宇由頭到尾都係瞓身支持。
攝影︰陳順禎
吳鎮宇唔受氹 搞笑都要型
成日話當自己有難，你立即諗起向邊個求救，那位就是你的老死。君如要當上導演一職拍套喜劇，第一時間就諗到搵鎮宇同方中信幫手，壯壯膽！君如說︰「我一提出搵方中信，大家就好興奮，覺得平時正正經經嘅佢，好有反差效果。」但同時又擔心佢演笑得唔得呢？始終一個喜劇演員，是要在觀眾面前不停搞笑，大家才會對你產生搞笑感情，從而見到你就想笑。「結果佢好成功，加上說服到佢戴個假髮扮地中海，頭髮係男人命根，咁佢都係好唔話得。」
同一套路，同樣有向吳鎮宇埋手，好可惜鎮宇哥唔受。吳鎮宇說︰「佢話型人在喜劇中要醜化下，方中信接受這講法，但我唔受，我話型人在喜劇更加要型，型到得自己覺得型，無人信先會好笑。」所以鎮宇都要戴假髮，但就戴一個90年代郭富城頭出嚟，好似讓時間停止流動一樣。
戴完假髮個個都驚咗方中信
講番個禿頭，方中信起初是認同好好笑的，但拍到中段，出現皮膚敏感就直接影響拍攝情緒。方中信說︰「試造型一刻係覺得好過癮，好好笑，又禿頭又盛，但當你日日戴十幾個鐘連續拍40幾日後，真係好難頂。」「呢樣我有經驗呀！」此刻吳鎮宇搶白︰「拍《脫皮爸爸》時要化老妝，初初覺得終於有一次為藝術犧牲。試完妝仲覺得幾好呀！冇事呀！到正式拍攝，每日焗住14個鐘仲要拍40日，簡真想發癲。」
吳鎮宇補充︰「成件事最荒謬係他要演繹一個為遮掩地中海，所以就戴個假髮，於是這個角色就要先笠個頭套扮地中海，然後再笠一個假髮遮住個地中海，真係為藝術犧牲。」吳君如說︰「現場大家都好膽戰心驚呀，好怕觸動到方中信的情緒，幸好劇組都理解演員是靠情緒演戲，偶然讓他發洩下都好正常，不過現場工作人員都好擔心好驚。吳鎮宇說︰「其實拍喜劇從來都不輕鬆，如果是一部認真的喜劇就更加想死，因為要度好耐。」
港產片場拍攝術語
難得3位聚頭，都引發3位想起當年，為港產片日以繼夜瘋狂拍攝的日子，而部分「優良」傳統，在今次都有沿用，而那些傳統，都有個有趣的名字包裝，明明係痛苦的事，聽落都舒服點。
一, 要打四圈
聽落以為大家等埋位，於是打四圈來消磨時間，但其實原來打四圈是一個痛苦過程。吳君如說︰「其實個意思係大家走埋一齊度一度、圍一圍今晚拍的場口，對白點講，度到件事順先拍，而所花的時間分分鐘係打四圈牌咁耐，所以就叫打四圈。」今次比較好是本身已經有詳盡劇本，主要是打番一圈梳理下就得，換轉以前，就真係連對白都冇，淨係知要拍乜，一班演員圍埋就度，好痛苦。
二, 補番個甜品
打四圈唔係講打麻雀，咁番補甜品又點會係宵夜萬歲食甜品，所謂甜品即是今時今日講的彩蛋。有時度好一個Gag，覺得好正但放不到入戲內，於是就待出Credit時出。吳君如說︰「之前拍《金雞sss》，見首周票房大收，立即拍個加長版，等人入場睇多次。而去到《12金鴨》，電影上映首周搵到彭于晏，於是自己同製片兩個人托住部機就衝上去拍，即剪即上。」不過這都是港產片的味道，現時合拍制度，加片段就要再審查一次，所以現在只有摙到最後一滴。
化妝︰Midco Chu（吳君如）
髮型︰Seiko Sin @ Hip Hair Culture（吳君如）
服裝︰Sacai@Lane Crawford（吳君如）、DIESEL（方中信）